У Белгарадзе пасля абстрэлу без электрычнасці засталася палова горада
Пад абстрэл сёння трапіў і горад Шабекіна ў Белгарадскай вобласці / @vvgladkov
У Белгарадзе без электрычнасці засталася палова горада, паведамляюць расійскія паблікі. Ёсць і праблемы з вадой. Праз адключэнне электраэнергіі адключылася і помпавая станцыя. На месцы цяпер працуюць аварыйныя брыгады.
У Белгарадэнерга кажуць, што "адключэнне электраэнергіі на Харкаўскай гары і ў цэнтры Белгарада звязанае з тэхналагічным парушэннем у сетцы 6 кВ. у 60% спажыўцоў падача электраэнергіі ўжо адноўленая па рэзервовым схемах. Цягам гадзіны электразабеспячэнне будзе адноўленае ў поўным аб'ёме".
Нагадаем, раніцай губернатар рэгіёна Вячаслаў Гладкоў казаў пра траплянні снарада у адзін з аб'ектаў інфраструктуры ў Белгарадзе. "Разбурэнні нязначныя, яны не паўплываюць на працу энергазабеспячэння горада", — запэўніў губернатар.
Пазней ён паведаміў яшчэ пра моцны абстрэл горада Шабекіна. Па яго словах, "ёсць пацярпелыя. Мужчына з раненнем грудной клеткі, у цяжкім стане. Жанчыну дастаўляюць у раённую ЦРБ".
Адзначым, што апошнія некалькі дзён расійскія войскі абстрэльваюць украінскія гарады, у тым ліку пры дапамозе дронаў-камікадзэ. Былі траплянні ў жылыя дамы, ёсць ахвяры і пацярпелыя.
