У дзясятках гарадах Беларусі зафіксавалі тэмпэратурныя рэкорды
Спёка ў пачатку восені (ілюстрацыйнае фота) / Еўрарадыё
У дзясятках гарадах Беларусі зафіксавалі тэмпэратурныя рэкорды, піша "Позірк". Пра гэта сведчыць аналіз аператыўных і архіўных даных Белгідрамета.
24 верасня новыя максімумы з'явіліся ў 23 гарадах (у тым ліку і ў сталіцы). Гарачэй за ўсё было на мэтэастанцыі "Палеская" ў Лунінецкім раёне — 27,8 градуса. Папярэдні рэкорд — 26,7 — трымаўся з 2015 года. Тады была зафіксавана і рэкордная для гэтага дня для ўсёй краіны тэмпература паветра — 29,2 градуса ў Гомелі.
У Мінску ў аўторак было 26,6 градуса. Ранейшы рэкорд (25,9) пратрымаўся дзевяць гадоў. Мясцовыя максімумы абноўленыя ў Брэсце, Гродне, Слуцку, Баранавічах, Бабруйску, Ваўкавыску і іншых гарадах.
У бліжэйшыя дні ў нашай краіне захаваецца цёплае надвор'е.
