У Гомелі асудзілі двух сутэнёраў з Расіі

Суд Цэнтральнага раёна Гомеля вынес вырак двум сутэнёрам з расійскага Калінінграда. Аднаму з іх прысудзілі 5 гадоў калоніі ўзмоцненага рэжыму, другому — пяць гадоў і тры месяцы. Да іх была ўжытая амністыя, якая скараціла тэрмін пакарання на адзін год.

Як піша "Гомельская праўда", 32-гадовы і 36-гадовы мужчыны знаёміліся з дзяўчатамі праз інтэрнэт і прапаноўвалі заняцца прастытуцыяй. Калі ж дзяўчаты пагаджаліся уцягнуць у гэта сяброўку, ім абяцалі прэмію.

Знайшоўшы прыдатныя кандыдатуры, мужчыны прыехалі ў Беларусь і паспрабавалі вывезці ўсіх дзяўчат у Калінінград. Ім прапанавалі ў Расіі жытло, медагляд і заробак.

Расіян абвінавацілі ў замаху на арганізацыю і выкарыстанне занятку прастытуцыяй iншай асобай, спалучанае з вывазам асобы за межы дзяржавы.

Паказанні ў судзе давалі тры сведкі. Дзяўчаты давалі сведчанні ў доўгім адзенні, з вуаллю на галаве. Імёны сведак ведаў толькі суддзя, які вёў працэс.

Фота — operkor.wordpress.com