У Гродне пасля даносу Бондаравай адмянілі лекцыю біблеісткі Ірыны Дубянецкай

У Гродзенскім пабе Harats адмянілі лекцыю біблеісткі, супрацоўніцы Інстытута філасофіі НАН РБ Ірыны Дубянецкай. У сацсетках установы з'явілася паведамленне, што "Вечар беларускай магіі" адмяняецца "з тэхнічных прычын". На гэта звярнуў увагу рэсурс "Медыязона".

Мерапрыемства павінна было прайсці ў нядзелю. Але днём прарасійская актывістка Вольга Бондарава напісала ў сябе ў сацсетках, што "на жаль, няма закона, які перашкодзіў бы бчбэшніцы разбураць хрысціянскія асновы дзяржавы". Яна таксама задалася пытаннем, куды глядзіць "ідэалогія", "ці ведае пра мерапрыемства, што мае адбыцца" і "ці ўхваляе". Увечары Бондарава ўжо дзякавала за "выразную пазіцыю і якасную працу ў няўрочны час".

Ірына Дубнецкая — доктар багаслоўя. Працавала ў Музеі гісторыі беларускай літаратуры, выкладала на філалагічным факультэце БДУ, Інстытуце замежных моў, Акадэміі мастацтваў. У канцы 1980-х гадоў была сябрам суполкі "Талака", якая займалася адраджэннем беларускай культуры. Доктарскую дысертацыю абараніла па тэме "Космас і хаос у яўрэйскай Бібліі і міфалогіях Старажытнага Блізкага Усходу". З'яўляецца членам Саюза беларускіх пісьменнікаў.

Аб працоўнай дзейнасці Вольгі Бондаравай амаль нічога не вядома. Некаторы час яна працавала адказным сакратаром у газеце камуністаў "Товарищ", але пасля рэзкіх заяў на адрас Лукашэнкі КПБ завяршылі адносіны з даносчыцай.