У Гродне просяць ацаніць дзеянні мігранта, які сек дрэвы ў мясцовым лесе

Больш за 800 чалавек падпісалі на дадзены момант зварот у Гродзенскі лясгас і абласную інспекцыю аховы жывёльнага і расліннага свету. У звароце — просьба растлумачыць сітуацыю з высечкай дрэў у лесе пад Гроднам. 

Аўтараў звароту збянтэжылі фатаграфіі з беларуска-польскай мяжы, якія з'явіліся днямі. На адным са здымкаў мігрант сячэ дрэвы. Месца дзеяння — як мяркуецца, раён пункта пропуску "Брузгі".

"Ёсць усе падставы меркаваць, што названыя дзеянні могуць быць незаконнай высечкай", — адзначаюць аўтары звароту. У сувязі з гэтым падпісанты петыцыі просяць правесці праверку дадзенага факту, патлумачыць, ці выдаваўся ордар на высечку лесу, і, "у выпадку, калі названы ордар не выдаваўся" пачаць у дачыненні да грамадзяніна, які трапіў на фота, адміністрацыйны працэс.

Збор подпісаў пад петыцыяй яшчэ працягваецца.