У Камянцы прааперавалі ўкраінскага футбаліста, які пацярпеў у ДТЗ
Фота: gaibrest.by
Беларускія медыкі прааперавалі ўкраінскага хлопчыка, які пацярпеў у сур'ёзным ДТЗ раніцай 13 траўня. Пасля аварыі дзіця знаходзіўся ў вельмі цяжкім стане і было падлучанае да апарата штучнай вентыляцыі лёгкіх. Паколькі хлопчык атрымаў спалучаную траўму, у аперацыйнай адначасова працавала некалькі брыгад дактароў.
Пасля стабілізацыі стану хлопчык пераведзены з Камянецкай цэнтральнай раённай лякарні ў Брэсцкую абласную лякарню. Крыху раней у Брэст былі перавезены яшчэ пяцёра хлопцаў, якія таксама пацярпелі ў ДТЗ. Ва ўсіх дыягнаставаныя чэрапна-мазгавыя траўмы рознай ступені цяжкасці, пераломы і вывіхі. Сябры рэспубліканскага кансіліуму зараз працуюць з кожным дзіцем і карэктуюць яго лячэнне, паведамляе прэс-служба Міністэрства аховы здароўя Беларусі.
