У Мазыры невядомы паведаміў пра мініраванне будынка КДК і ДАІ
6 лютага ў 10:10 міліцыянты атрымалі паведамленне, што ў Мазыры замініраваны будынак па вуліцы Ленінскай, 64, інфармуе uvd.gomel.by.
У гэтым будынку размяшчаюцца Мазырскі міжраённы камітэт дзяржаўнага кантролю, інтэрнат, крама, памяшканні КЖУП "Мазырскі райжылкамгас" і аддзяленне Дзяржаўтаінспекцыі Мазырскага РАУС.
Цяпер на месцы здарэння працуюць супрацоўнікі міліцыі, Следчага камітэта, МНС ды іншых ведамстваў. Сапёрна-піратэхнічная група вайсковай часці 5525 МУС абследуе будынак.
З самога будынка эвакуявалі 83 чалавекі. Побач размешчаны Мазырскі дзяржаўны абласны ліцэй, з яго эвакуявалі 241 навучэнца і сем настаўнікаў.
Напярэдадні, як паведамляла Еўрарадыё, паведамленне пра мініраванне атрымала кампанія "Белавія". Спецыялісты шукалі выбухоўку ў мінскім офісе кампаніі, а таксама ў гомельскім і віцебскім аддзяленнях.
