У мінскай школе збіраюць на снегаўборачную машыну і бутэрброды. А так можна?

19/02/2024 - 13:07

Нават чыноўнікі здзіўляюцца / @rubanau_collage

— Спачатку збіралі грошы на ручкі і сшыткі, кветкі і бутэрброды настаўнікам. Цяпер вырашылі купіць у падарунак школе снегаўборачную машыну!

Бацькі навучэнцаў школы №167 Мінска абураныя паборамі, якія ініцыюе маці з бацькоўскага камітэта.

— У пачатку навучальнага года гэтая жанчына ў патрабавальным тоне напісала ў чат, што трэба здаць да Новага года 150 рублёў. Калі яе спыталі, на што, яна адказала, што дзецям трэба купіць для экзамену прыналежнасці — ручкі, сшыткі і... "усё астатняе".

“Здайце хаця б 50 рублёў”

Грошы здалі не ўсе бацькі, але і абурацца разам не сталі. Пазней адной з маці патэлефанавала класная і "слёзна маліла" здаць хаця б 50 рублёў. Настаўніца сказала, што на носе выпускныя экзамены, якія будуць праходзіць цэлы дзень. Трэба будзе купіць кветкі для экзаменацыйнай камісіі, накрыць стол і — "хаця б па шакаладцы дзеткам".

Пазней бацькам абвясцілі, што трэба здаць яшчэ па 70 рублёў: па-першае, на нейкую экскурсію, па-другое, трэба купіць арыгінальны "падарунак" школе — снегаўборачную машыну!

— Гэта ўжо ні ў якія вароты не лезе. Ладна скінуцца на нешта рублёў па 20, аддзячыць настаўнікам. Мы ўсе разумеем, якія ў іх заробкі. З іншага боку, калі дзеці хварэюць і нешта прапускаюць па праграме, яны мусяць самі яе даганяць. А яшчэ ў нас даўно тут склалася правіла, што настаўнік апрыёры мае рацыю і скардзіцца на яго нельга, нават калі ён робіць несправядліва.

За што дзякаваць некаторым настаўнікам, абсалютна незразумела. За хамства і грубасць? За тое, што кажуць, што будуць з вушэй вырываць бесправадныя навушнікі, калі заўважаць на экзаменах? Што гэта ўвогуле за рыторыка?!

Бацькі не маюць права прымушаць іншых здаваць грошы

Бацькі, з якімі мы пагутарылі, упэўненыя: ні адна маці з бацькоўскага камітэта не мае права прымушаць іншых здаваць грошы, і не разумеюць, чаму іншыя не пярэчачы слухаюцца нечых капрызаў.

У пастанове Мінадукацыі №126 гаворыцца, што бацькоўскім камітэтам афіцыйна забаронена збіраць грошы ў школах і дзіцячых садках.

Нават калі грошы збірае адміністрацыя школы, бацькі маюць права адмовіцца. Пра гэта яшчэ ў пачатку навучальнага года гаварыў Лукашэнка, выступаючы на нарадзе па пытаннях удасканалення адукацыйнай сферы.

— І не трэба. Адмовіўся дык адмовіўся, абыдземся.

Але што рабіць, калі ў бацькоўскім камітэце анархія, а настаўнікі не рэагуюць? Як адстойваць свае правы і пры гэтым не стаць ахвярай булінгу? Урэшце, хто прыдумаў правілы пісаць аднолькавымі ручкамі на экзаменах і карміць бутэрбродамі экзаменацыйную камісію? Снегаўборачная машына ў падарунак школе?..

Журналістка Еўрарадыё пад выглядам звычайнай грамадзянкі патэлефанавала ва ўпраўленне адукацыі Фрунзенскага раёна, да якога належыць школа №167.

— Калі хтосьці з бацькоў вырашыў "я хачу", гэта не значыць, што ўсе астатнія мусяць скінуцца і купляць школе снегаўборачную машыну, — рэагуюць у ведамстве. - Усе жывуць па сваіх сродках. У кагосьці іх больш, у кагосьці менш. Увогуле, нейкая вар'яцкая сітуацыя.

У аддзеле дашкольнай, агульнай сярэдняй і спецыяльнай адукацыі, куды нам параілі звярнуцца, адразу кажуць, што ніякага правіла купляць аднолькавыя ручкі і сшыткі на экзамены няма.

— Якая розніца, аднолькавыя ў іх вокладкі ці не? Яны ўсё роўна здымаюцца, а на экзаменацыйных аркушах, якія раздаюць школьнікам, прастаўляюцца дзяржаўныя пячаткі. Ні завучы, ні дырэктары нічога такога не патрабуюць.

Што да экскурсій, то вы можаце ўзгадніць паездку з упраўленнем па адукацыі і паехаць. Але каб хтосьці кагосьці прымушаў ехаць — такога быць не мусіць, як і правіла накрываць стол для настаўнікаў. Што значыць карміць камісію бутэрбродамі? Гэта проста смешна! Я не ведаю, чые гэта прыдумкі.

Скажыце маме з бацькоўскага камітэта: прабачце, нідзе не напісана, што мы мусім збіраць на гэта грошы. Вас ніхто не мае права прымусіць.

Ва ўпраўленні адукацыі звяртаюць увагу: любое пытанне мусяць вырашацца ўсім калектывам, а не адным чалавекам. Ёсць жаданне падарыць школе падарунак? Падарыце разам з тымі, хто не супраць. Папракаць бацькоў, якія не могуць ці не хочуць здаваць на яго грошы, недапушчальна.

— Калі бацькі хочуць дапамагчы школе, у выпадку, калі працуе апякунская рада, грошы збіраюцца на разліковы рахунак установы адукацыі. Бацькоўскі камітэт грашовыя пытанні вырашаць не мусіць. Гэта парушэнне. Мама, якая прымушае бацькоў здаваць на нешта грошы, падстаўляе дырэктара школы.

Ва ўпраўленні па адукацыі Фрунзенскага раёна паабяцалі звязацца з адміністрацыяй школы №167 найбліжэйшым часам, пагаварыць з дырэктарам і разабрацца ў сітуацыі.