У Мінскай вобласці хірург праз суд прымусіў шпіталь прадоўжыць з ім кантракт
У клініцы, ілюстрацыйнае фота / pixabay.com
Адміністрацыя шпіталя ў Мінскай вобласці вымушаная была перагледзець сваё рашэнне аб звальненні доктара. Дапамог суд. Гісторыю расказвае "Медыцынскі веснік".
Мужчына працаваў у шпіталі спачатку хірургам, затым загадчыкам прыёмнага аддзялення. Па заканчэнне чарговага кантракта доктара папярэдзілі, што прадаўжаць працоўныя адносіны з ім не будуць, хоць у яго заставалася менш за тры гады да пенсіі. Наймальнік аргументаваў сваё рашэнне тым, што ў доктара былі дысцыплінарныя спагнанні.
Мужчыну звольнілі, і ён пайшоў у суд. Суд палічыў, што звальненне было незаконным — у выніку доктара аднавілі на працы на ранейшай пасадзе. Працадаўца яшчэ павінен выплаціць яму больш за 6,5 тысяч рублёў. Гэта заробак за час вымушанага прагулу, кампенсацыя маральнай шкоды і судовыя выдаткі. Хірург ужо вярнуўся на працу.
