У Мінску асуджаны 15 чалавек па гучнай справе аб хабарах (фота)

КДБ затрымаў 12 службовых асоб сістэмы Мінлясгаса і 2 прадпрымальнікаў у пачатку 2018-га. Было заяўлена, што службовыя асобы сістэмы Мінлясгаса бралі грошы “рэгулярна, паслядоўна, сістэмна”, з кожнага кубаметра піламатэрыялу — ад 2 да 5 еўра (за год вывозілася каля 36 тысяч кубаметраў піламатэрыялаў). Тады “за непрыняццё дзейсных мер па барацьбе з карупцыяй і эканамічнымі правапарушэннямі ў падведамасных арганізацыях” быў звольнены міністр лясной гаспадаркі Міхаіл Амельяновіч. Аляксандр Лукашэнка наступным чынам ахарактарызаваў сітуацыю ў сферы лясной гаспадаркі: “Бардак поўны, хабарнік на хабарніку сядзіць”.

Цэнтральны суд сталіцы разглядаў гучную справу са студзеня гэтага года. З 15 абвінавачаных толькі двое былі пад вартай. Астатнія 13 прыйшлі на абвяшчэнне прысуду з вялізнымі сумкамі — кайданкі на іх руках з'явіліся ў зале суду. Як інфармуе "Беларусь сегодня", абвінавачных прызналі вінаватымі ў дачы і атрыманні хабараў, ва ўхіленні ад выплаты падаткаў. Тэрміны для тых, хто даваў хабары, склалі 3 гады абмежавання волі без накіравання ў папраўчую ўстанову адкрытага тыпу. Для астатніх — ад 1 года шасці месяцаў да 4 гадоў калоніі ўзмоцненага рэжыму. Суд арыштаваў іх маёмасць.