Улады прыдумалі новы "чынш" для будаўнікоў

На грамадскае абмеркаванне вынесены праект указа Аляксандра Лукашэнкі "Аб мэтавых адлічэннях". Тычыцца дакумент будаўнічай галіны.

Так, калі ўказ будзе падпісаны, усе бударганізацыі павінны будуць аддаваць 0,07% ад кошту будаўніцтва, калі фінансаванне ідзе за дзяржаўны кошт. Калі за кошт іншых сродкаў — 0,09%. Улічваючы, што будаўніцтва — рэч нятанная, гаворка ідзе пра досыць буйныя сумы.

Прычына, з якой для будаўнікоў хочуць увесці такі збор, простая: будаўнічыя фірмы ў тэорыі мусяць адлічваць сродкі арганізацыям, якія сочаць за цэнаўтварэннем у сферы. Так, ёсць і такія, прычым у кожнай галіне і, вядома ж, дзяржаўныя. Але паводле заканадаўства такіх адлічэнняў можна пазбегнуць — вось будаўнікі і не спяшаліся пералічваць туды грошы.

Абмеркаванне праекта ўказа будзе доўжыцца з 12 да 22 мая на прававым форуме.

Каб сачыць за галоўнымі навінамі, падпішыцеся на канал Еўрарадыё ў Telegram.

Мы штодня публікуем відэа пра жыццё ў Беларусі на Youtube-канале. Падпісацца можна тут.