Усё яшчэ не "па 500". У якіх раёнах Беларусі жывуць найбядней

06/06/2024 - 12:21

Што ў Беларусі з заробкамі? / @rubanau_collage

Чыноўнікі выхваляюцца ростам сярэдняй зарплаты ў Беларусі: у 2023-м яна склала 1915 рублёў. Але калі глядзець па рэгіёнах краіны і канкрэтных прафесіях, усё не так радасна.

Менш за ўсіх зарабляюць жыхары Кармянскага раёна Гомельскай вобласці — 1229 рублёў. Таксама ў тройку найбяднейшых уваходзяць Шаркаўшчынскі (1256 рублёў) і Кастрычніцкі (1256 рублёў) раёны. Памятаем, што трэба адняць 13% падаходнага падатку і 1% на ФСАН, то-бок па факце лічбы прыкметна меншыя. Далёка да запаветных "па пяцьсот".

А самай высокай "палучкай" могуць пахваліцца жыхары Мінска (2569 рублёў), Салігорскага (2346 рублёў) і Астравецкага раёнаў (2340 рублёў).

А што адбываецца ў сельскай гаспадарцы, адукацыі і медыцыне, пра якія так часта кажуць чыноўнікі? Еўрарадыё пакапалася ў статыстыцы.

Што ў настаўнікаў?

У 2023 годзе беларускія педагогі ў сярэднім зараблялі 1317 рублёў у месяц — гэта амаль на 200 рублёў больш, чым за год да таго. Але пры гэтым да сярэдняга заробку па краіне не хапае амаль 600 рублёў.

Менш за ўсё работнікі сферы адукацыі зарабляюць у Мёрскім раёне — 1086 рублёў, сціплыя даходы ў педагогаў з Краснапольскага (1089 рублёў) і Клімавіцкага (1097 рублёў) раёнаў. А калі адняць 14% падаткаў, атрымаецца нават менш за 1000 рублёў на месяц.

Самыя "багатыя" педагогі жывуць у Мінску і ў Мінскім раёне, тут сярэдняя зарплата складае 1590 і 1394 рублі адпаведна, далей ідуць Дзяржынскі раён (1339 рублёў) і Брэст (1321 рубель).

Як справы ў медыцыне?

У ахове здароўя справы трохі лепшыя, чым у адукацыі. Тут сярэдні заробак складае 1602 рублі.

Горш за ўсё справы ў Шаркаўшчынскім раёне: у сярэднім — 1162 рублі. Недалёка ў антырэйтынгу размясціліся Дрыбінскі раён (1190 рублёў) і Ельскі (1199 рублёў).

Практычна ў два разы больш атрымліваюць медыкі з Мінска — 2077 рублёў, побач работнікі аховы здароўя з Мінскага раёна — 1938 рублёў. У топ-3, але з даволі вялікім адставаннем, увайшоў Віцебск — 1653 рублі.

Любімая галіна беларускіх чыноўнікаў — сельская гаспадарка

Зарплата аграрыяў з 2022 па 2023 год хоць і дадала амаль 250 рублёў, у сярэднім складае ўсяго 1486 рублёў. Больш за тое, ёсць рэгіёны, дзе плацяць амаль удвая менш.

Так, жыхары Жодзіна, якія працуюць у сферы сельскай гаспадаркі, зарабляюць у сярэднім 600 рублёў. Прычым яшчэ два гады таму тут плацілі 1520 рублёў.

Крыху лепш пачуваюцца аграрыі з Мёрскага раёна — 973 рублі, на тры рублі больш атрымліваюць у Шаркаўшчынскім раёне, 1026 рублёў у сярэднім маюць у Браслаўскім раёне.

Калі вы працуеце ў сельскай гаспадарцы і хочаце атрымліваць прыкметна больш — пераязджайце ў Наваполацк ці Мінск, тут у сярэднім плацяць 2376 і 2350 рублёў адпаведна.

У чыноўнікаў усё добра (сюрпрыз!)

У дзяржаўным кіраванні справы ідуць нядрэнна. За год сярэдні даход у галіне вырас на 465 рублёў — з 1886 у 2022-м да 2351 рубля ў 2023-м. Звычайныя бюджэтнікі такім заробкам могуць толькі зайздросціць.

Менш за ўсё плацяць чыноўнікам з даволі буйных рэгіёнаў: у Бабруйскім раёне — 1266 рублёў, у Віцебску — 1561 рубель, у Пінскім раёне — 1676 рублёў.