Васілевіч: Улады не рэагуюць на прапанову стварыць інстытут амбудсменаў
Былы Генпракурор Рыгор Васілевіч распрацаваў Канцэпцыю інстытута ўпаўнаважанага па правах чалавека і накіраваў ў розныя установы амаль год таму.
Але да гэтага часу атрымаў толькі адзін адказ — падзяку за зробленую працу ад намесніка кіраўніка прэзідэнцкай адміністрацыі Валерыя Міцкевіча. Пра гэта Еўрарадыё даведалася ад загадчыка кафедры канстытуцыйнага права юрфака БДУ.
Рыгор Васілевіч: “Той жа Валерый Вацлававіч (Міцкевіч — Еўрарадыё) даслаў ліст з падзякай за такую ініцыятыву. Я думаю, што тут парламенцкія камісіі павінны сваё слова сказаць… Для таго і парламент — ён прадстаўляе народ, калегіяльны орган. Я думаю, што яны таксама павінны быць зацікаўленыя ў тым, каб з’явілася такая структура”.
Былы Генпракурор упэўнены, што сістэмы органаў, якія “забяспечваюць правы і свабоды грамадзян неабходна ўзмацняць — праблем там шмат”. Але пакуль абмеркаванне распрацаванай Васілевічам канцэпцыі абмежавалася некалькімі “мерапрыемствамі, у тым ліку — на факультэце міжнародных адносінаў”. У іх бралі ўдзел навукоўцы, прадстаўнікі замежных амбасад і асобныя зацікаўленыя людзі.
Нагадаем, напачатку сакавіка 2013 года Рыгор Васілевіч праз Еўрарадыё анансаваў распрацаваную ім канцэпцыю стварэння такога нечаканага для нашай краіны інстытута ўлады, як упаўнаважаны па правах чалавека.
