З Мінска не выпускаюць самалёт, на якім прыляцеў гендырэктар "Уралкалія"

Пра гэта РІА "Новости" паведаміў начальнік упраўлення па сувязях з грамадскасцю "Уралкалія" Аляксандр Бабінскі. Паводле яго слоў, беларускія ўлады гэтую сітуацыю ніяк не каментуюць. Самалёт па-ранейшаму знаходзіцца на стаянцы ў аэрапорце.

Паводле звестак агенцтва "Прайм", самалёт, які быў затрыманы ў мінскім аэрапорце — гэта LearJet 60XP. Ён прызначаны для выкарыстання на авіялініях сярэдняй працягласці.

Нагадаем, кіраўніка "Уралкалія" Уладзіслава Баўмгертнера затрымалі ў панядзелак, 26 жніўня, у Мінску ў аэрапорце пасля сустрэчы з прэм'ерам Міхаілам Мясніковічам. Гендырэктар “Уралкалія” нанёс шкоду нацыянальным інтарэсам Беларусі, заявіў Следчы камітэт Беларусі. Баўмгертнеру выстаўленае абвінавачанне ва злоўжыванні ўладай і службовымі паўнамоцтвамі. Яму пагражае да 10 гадоў пазбаўлення волі з канфіскацыяй маёмасці. Следчы камітэт паведаміў, што страты па справе Беларускай калійнай кампаніі ацэньваюцца на 100 млн долараў. Баўмгертнер знаходзіцца ў следчым ізалятары КДБ.
 

Фота — strondingair.com