За адстаўку міністра адукацыі Карпенкі падпісаліся больш за 1300 чалавек

Пад петыцыяй за адстаўку міністра адукацыі Ігара Карпенкі за двое сутак падпісалася больш за 1300 чалавек. 

Аўтарам петыцыі стаў старшыня Беларускай сацыял-дэмакратычнай партыі (Грамада) Ігар Барысаў. Накіраваць зварот мяркуецца ў Адміністрацыю прэзідэнта

У петыцыі гаворыцца, што Карпенка не справіўся сітуацыяй, якая ўзнікла ў выніку пандэміі каранавіруса: 

— не здолеў арганізаваць дыстанцыйнае навучанне школьнікаў і студэнтаў;

— не здолеў забяспечыць бяспеку школьнікаў, студэнтаў, настаўнікаў і выкладчыкаў праз адмену альбо перанос заняткаў;

— нагрузка на настаўнікаў праз палітыку Мінадукацыі павялічылася ўдвая, бо ім даводзіцца займацца і са школьнікамі ў класах, і дыстанцыйна. Пры гэтым заробкі настаўнікаў засталіся на ранейшым ўзроўні;

— Мінадукацыі не мае дакладнай пазіцыі наконт арганізацыі адукацыйнага працэсу;

— паведамляецца, быццам Мінадукацыі не праверыла тэхнічныя магчымасці школьнікаў і студэнтаў для ўвядзення дыстанцыйнай адукацыі і не арганізавала выдачу патрэбнага абсталявання тым, хто мае ў гэтым патрэбу (планшэтаў). Таксама не было спробаў арганізаваць бясплатны інтэрнэт для настаўнікаў, выкладчыкаў і школьнікаў пры дыстанцыйнай адукацыі.

Дарэчы, гэта ўжо трэцяя петыцыя за адстаўку Карпенкі з пасады міністра адукацыі. У 2018 годзе аналагічную петыцыю падпісалі 845 чалавек, у 2019-м — 307.

Каб сачыць за галоўнымі навінамі, падпішыцеся на канал Еўрарадыё ў Telegram.

Мы штодня публікуем відэа пра жыццё ў Беларусі на Youtube-канале. Падпісацца можна тут.