Затрыманага за перфоманс брэстаўчаніна адвезлі ў вар'ятню

Як паведамляла Еўрарадыё, 15 снежня грамадскі актывіст зрабіў зварот на прыступках Брэсцкага аблвыканкаму. Там ён пакаяўся за грахі беларускіх уладаў перад сваім народам. Малады чалавек быў апрануты ў строй біблейскага прарока з чырвонай фарбай на звязаных руках, якая сімвалізавала кроў беларусаў.

Праз 10 хвілін пасля акцыі Алеся Чаркашына затрымала міліцыя, і яго адвезлі ў Ленінскі РУУС.

Як паведаміў Еўрарадыё брэсцкі актывіст БХД Зміцер Шурхай, з міліцэйскага пастарунку Чаркашына забралі санітары. Зараз ён знаходзіцца ў псіхіятрычным стацыянары. Са словаў дзяжурнага Ленінскага РУУС, там актывіст можа прабыць да трох дзён.

Шурхай: "Я лічу, што гэта было зроблена, па-першае, з мэтай псіхалагічнага ціска, а па-другое — каб дыскрэдытаваць яго. Я яго добра ведаю, і магу заявіць, што ён нармальны і адэкватны чалавек. І не было ніякіх падставаў яго затрымліваць".

Зміцер Шурхай таксама дадаў, што Чаркашын сапраўды з'яўляецца сябрам БХД, але гэты перфоманс ён рабіў выключна са сваёй ініцыятывы.