Жыхары Лоева скардзяцца на спецназаўцаў, заселеных у дзявочы інтэрнат педкаледжа

Жыхары Лоева на беларуска-ўкраінскім памежжы сталі скардзіцца на вайскоўцаў, заселеных у мясцовы інтэрнат педкаледжа, піша "Зеркало".

Як паведамлялася раней, вайсковы спецназ засялілі ў дзявочы інтэрнат на пачатку верасня. У каледжы вучацца пераважна непаўналетнія дзяўчаты, якія паступаюць туды пасля заканчэння 9-га класа школы.

Жыхарка Лоева расказала журналістам, як паводзяцца вайскоўцы: "Паводзяцца неадэкватна, гучна лаюцца. Часта бачыла іх п'янымі. Яны рэгулярна чапляюцца да дзяўчат. Я гэта адчула на сабе, месяц таму вымушана была ад іх уцякаць. Стала страшна хадзіць па вуліцы ўвечары — не ведаеш, што можа з табой здарыцца".

Журналістка выдання затэлефанавала ў інтэрнат пад выглядам сваячкі адной з навучэнак. Загадчыца інтэрната Людміла Атрошчанка адрэагавала на пытанні даволі рэзка: "У нас ніхто нікога не баіцца. Усё гэта глупства! Як прозвішча вашай сястры? Няхай падыдзе да мяне - я з ёй пагавару. А лішнюю вось гэтую пургу пускаць не трэба!"

Як доўга ў інтэрнаце застануцца жыць вайскоўцы, дырэктарка каледжа Раіса Каляда казаць адмовілася. Яна параіла перадаць дзяўчатам, якія перажываюць праз суседства з салдатамі, падысці асабіста да яе на размову, а яна "ўсё растлумачыць".

У Гомельскім абласным упраўленні адукацыі ўдакладнілі, што вайскоўцы жывуць на іншым паверсе і маюць асобны ўваход у будынак. Маўляў, хвалявацца дзяўчатам няма чаго, а калі што — хай звяртаюцца да дырэктаркі каледжа.