Зніклая памочніца Леаніда Судаленкі знайшлася ў гомельскім ІЧУ

Сувязь з памочніцай Леаніда Судаленкі Таццянай Ласіцай знікла напярэдадні днём. У чацвер, 21 студзеня, яна мусіла вылецець у Вільню, але на борт так і не села. У пятніцу яна знайшлася ў гомельскім ІЧУ, паведамляе агенцтва БелаПАН са спасылкай на праваабаронцу Васіля Палякова.

Абставіны і прычыны яе затрымання Палякову невядомыя. Між тым гомельская "Вясна" паведамляе, што Ласіцу затрымалі ў мінскім аэрапорце перад пасадкай на рэйс. 

У пачатку студзеня дома ў Таццяны Ласіцы прайшоў ператрус. Міліцыя канфіскавала ў яе камп'ютары і тэлефоны. У той жа дзень міліцыя прыйшла з ператрусамі ў офіс праваабаронцаў у Гомелі, а таксама дадому да Леаніда Судаленкі, Васіля Палякова і Мікалая Новікава.

18 студзеня, праз амаль два тыдні пасля допыту ў Следчым камітэце, Судаленку затрымалі. У гэты ж дзень была затрыманая і яшчэ адна памочніца праваабаронцы, Марыя Тарасенка. Праз тры дні праваабаронцу перавялі ў СІЗА, а Тарасенка адпусцілі.

Паводле дадзеных праваабаронцаў, Судаленку падазраюць у фінансаванні дзеянняў, якія груба парушаюць грамадскі парадак (арт. 342 КК).

Каб сачыць за галоўнымі навінамі, падпішыцеся на канал Еўрарадыё ў Telegram.

Мы штодня публікуем відэа пра жыццё ў Беларусі на Youtube-канале. Падпісацца можна тут.