ЗША маюць рэсурсы для падтрымкі і Украіны, і Ізраіля — кіраўнік Пентагона
Лойд Осцін і Чарльз Браўн. Брусель, 11 кастрычніка 2023-га / АР
ЗША маюць рэсурсы для падтрымкі і Украіны, і Ізраіля, заявіў кіраўнік Пентагона Лойд Осцін. Ён падкрэсліў, што Злучаныя Штаты могуць змагацца з крызісам у некалькіх месцах адначасова.
Як паведамляе "Голас Амерыкі", 11 кастрычніка міністр абароны ЗША Лойд Осцін і кіраўнік Аб'яднанага камітэта начальнікаў штабоў генерал Чарльз Браўн правялі прэс-канферэнцыю ў Бруселі. Яны ўдзельнічалі ў 16-й сустрэчы Кантактнай групы па пытаннях абароны Украіны (на ёй упершыню прысутнічаў украінскі прэзідэнт Уладзімір Зяленскі).
Кіраўнік Пентагона заявіў, што Украіна прадаставіла міністрам абароны краін NATO абноўленую інфармацыю пра контрнаступ і "марудны, але стабільны прагрэс". Таксама ён адзначыў, што самалёты F-16 Украіна можа атрымаць ужо вясной 2024-га, але не раней.
