100 чалавек атрымаюць бясплатныя візы на "Басовішча"

Арганізатары фестывалю "Басовішча-2015" дамовіліся на візавую падтрымку наведвальнікаў. Праўда, згодна з умовамі польскай амбасады ў Мінску, бясплатныя візы атрымаюць толькі 100 чалавек.

"Амбасада пагадзілася толькі на 100 візаў. Гэта няшмат, ведаем. Але добра, што хаця б столькі людзей змогуць яе атрымаць. Таксама вельмі важна, каб людзі даслалі да нас заяўкі да 21 чэрвеня, каб мы маглі добра падрыхтавацца да працы з амбасадай", – каментуе сітуацыю з візамі арганізатарка фэсту Ганна Пякарская.

"Басовішча-2015" пройдзе 17-18 ліпеня ў Гарадку, што на польска-беларускай мяжы. Хэдлайнерамі фэсту заяўленыя гурт Brutto і Лявон Вольскі. Таксама на сцэне выступяць беларускія каманды Dzieciuki і Yegor Zabelov Trio, польскія гурты Lao Che і Ostrov. Астатнія ўдзельнікі івенту будуць названыя цягам бліжэйшых двух тыдняў. Арганізатары кажуць, што чакаюць дадатковага фінансавання. Калі ў выніку яго не атрымаюць, то фэсту давядзецца зменшыць колькасць удзельнікаў.

Заяўкі дасылаць на адрас  [email protected].  У іх мусіць быць наступная інфармацыя: 

1) імя і прозвішча,

2) дата нараджэння,

3) адрас,

4) кантактны нумар,

5) нумар пашпарту,

6) дата выдання і прыдатнасці пашпарту.

Заяўкі прымаюцца да 21.00 21 чэрвеня.