Афрыканскую чуму зафіксавалі ўжо ў Баранавіцкім раёне? (відэа)

Як піша газета "Іntex-press", 25 чэрвеня ў жыхароў вёскі Ніжняе Чарніхова работнікі ветслужбы забралі свінняў з падворкаў на цэлай вуліцы.

Жыхары кажуць, што свінням рабілі ўкол, пасля ўзважвалі і грузілі ў кузаў грузавіка. А хлявы апрацоўвалі нейкім растворам.

Вяскоўцам спярша ніяк не тлумачылі гэтыя дзеянні, а потым сказалі, што эта афрыканская чума. Ім забаранілі трымаць свінняў 4 гады.

Жыхары іншых вуліц вёскі вырашылі не чакаць наступнага прыезду ветэрынараў і самі пакалолі свінняў.

Тым часам начальнік Баранавіцкай раённай ветстанцыі Мікалай Пакумейка заяўляе, што жывёлы былі хворыя на рэспіраторнае захворванне. Іх аналізы перададзеныя ў лабараторыю. Вынікі можна будзе даведацца прыкладна праз тры дні.

Нагадаем, што афіцыйна афрыканская чума свінняў выяўленая толькі ў Гродзенскай вобласці.

Фота — intex-press.by