"Аўтобусаў не хапае — аўтапарк Мазыра ператвараецца ў звалку металалому

Тэрыторыя "Аўтобуснага парку №2" у Мазыры паступова ператвараецца ў звалку металалому, піша "Флагшток" і публікуе здымкі з аўтапарка. Журналісты налічылі як мінімум 9 машын, якія не ў стане выйсці на рэйс.

Праблема з недахопам аўтобусаў на маршрутах у Мазыры ўзнікла ўжо даўно. Мясцовыя жыхары скардзяцца, што расклад не выконваецца, і яны гадзінамі вымушаныя чакаць свой аўтобус. Дырэктар парку Сяргей Кашэвіч шчыра прызнаўся, што 80% машын цалкам выпрацавалі свой рэсурс. У галаўным офісе ў Гомелі кажуць, што аб праблеме ведаюць.

"У нас не хапае рухомага складу, каб у поўным аб'ёме выконваць патрэбы насельніцтва ў пасажырскіх перавозках", — казаў гендырэктар ААТ "Гомельаблаўтатранс" Дзмітрый Старасценка. Ён распавядаў журналістам, што летась "мы атрымалі 14 машын гарадскіх і прыгарадных, сёлета ў кастрычніку мы чакаем паступленне яшчэ 12 машын".

Аднак пазней высветлілася, што 14 машын, аб якіх казаў Старасценка, у мінулым годзе не былі пастаўленыя. На нядаўнім пасяджэнні ў "Гомельаблаўтатрансе" з удзелам віцэ-прэм'ера Анатоля Сівака прагучала, што гэтыя 14 аўтобусаў будуць закупленыя сёлета. Затрымка з пастаўкай паўстала з-за таго, што МАЗ заняты выкананнем замоў для расійскага рынку. Таму беларускія аўтапаркі вымушаныя чакаць, піша" Флагшток " са спасылкай на чытачоў, знаёмых з сітуацыяй.