Беларускага часовага паверанага другі раз за тыдзень выклікалі ў МЗС Польшчы
Часовага паверанага ў справах Беларусі Аляксандра Часноўскага зноў выклікалі ў МЗС Польшчы, перадае "Польскае радыё".
Размова ішла пра сітуацыю на мяжы, паведаміў прэс-сакратар польскага міністэрства замежных спраў Лукаш Ясіна. Па яго словах, беларускія дыпламаты адмаўляюць здзяйсненне правакацый супраць Польшчы.
Часноўскага ўжо выклікалі ў МЗС Польшчы менш за тыдзень таму — 8 кастрычніка. Тады паведамлялася, што выклік звязаны "з сітуацыяй на польска-беларускай мяжы і агрэсіўнымі дзеяннямі Рэспублікі Беларусь супраць Рэспублікі Польшча".
