Беларуская АЭС па-ранейшаму не працуе
Вучэнні на БелАЭС (ілюстрацыйнае фота) / ostrovets.by
Беларуская АЭС па-ранейшаму не працуе. Гэта пацвердзіў у сераду гендырэктар "Белэнерга" Андрэй Панчанка. Паводле яго слоў, першы энергаблок усё яшчэ на "планава-папераджальным рамонце", а на другім працягваецца "дыягностыка датчыкаў".
"З улікам таго, што такіх датчыкаў на блоку вялікая колькасць, іх рэвізія займае пэўны час", — цытуе словы Панчанкі прэс-служба Міністэрства энергетыкі.
Мінэнергетыкі прызнала, што другі энергаблок БелАЭС не працуе, амаль месяц таму. Яго "часова адключылі ад сеткі" пасля "спрацоўвання аднаго з датчыкаў". З таго часу працягваецца іх "дыягностыка". Сцвярджалася, што гэтыя дзеянні "не ўплываюць на бяспеку працы станцыі і яе абсталявання".
Пра тое, што другі энергаблок адключаны з-за парушэння герметычнасці першага контуру, раней стала вядома з неафіцыйных крыніц. І адбылося гэта яшчэ ў ноч на 4 снежня 2024-га.
Першы энергаблок Беларускай АЭС на "планавым рамонце" з пачатку снежня. Другі энергаблок быў на рамонце летам-восенню, у сярэдзіне кастрычніка яго ўключылі ў сетку. Але нешта пайшло не так.
