Бодзібілдара і палітвязня Аляксандра Шарабайку асудзілі на паўтара года калоніі

Глыбоцкага бодзібілдара, фітнес-трэнера і актывіста Аляксандра Шарабайку асудзілі на паўтара года калоніі агульнага рэжыму. Яго прызналі вінаватым у "абразе Аляксандра Лукашэнкі", паведамляе vitebskspring.org.

Шарабайку затрымалі 13 сакавіка ў Глыбокім. Спачатку суддзя Андрэй Тарасевіч асудзіў яго на 10 сутак за каментары і лайкі ў інтэрнэце. Пасля быў этап у віцебскі СІЗА-2, дзе і выставілі абвінавачванне па крымінальным артыкуле. У красавіку беларускія праваабаронцы прызналі Аляксандра Шарабайку палітвязнем.

Прысуд вынес згаданы Тарасевіч. "Нягледзячы на татальны страх у беларускім грамадстве, на судовае пасяджэнне ўсё ж прыйшло некалькі чалавек падтрымаць свайго земляка і актывіста", — пішуць праваабаронцы.

З улікам тэрміну, які Шарабайка адседзеў за кратамі, яму застанецца да вызвалення каля 8 месяцаў.

Пасля выбараў 2020-га Аляксандра Шарабайку ўжо неаднаразова затрымлівалі. Аднойчы на яго затрыманне выязджалі 10 міліцыянераў на двух аўтамабілях.