Брытанцы кідаюць сваіх катоў, а Абама зачытаў рэп — #ІхНоравы

23/10/2024 - 15:27

Міжнародныя навіны / @rubanau_collage

Прэзідэнцкая гонка ў ЗША набліжаецца да фіналу, да дня выбараў застаецца крыху менш за два тыдні, а жарсці абвостраныя да мяжы (не тое што ў Беларусі). Вось, напрыклад, Барак Абама вырашыў падтрымаць Камалу Харыс, зачытаўшы некалькі радкоў з песні Эмінема. Як вам такое?

Брытанцы сталі часцей выкідваць катоў

Паводле звестак найбуйнейшай дабрачыннай арганізацыі па ратаванні жывёл у Вялікабрытаніі, сёлета колькасць кінутых катоў і кацянят у краіне вырасла больш чым на 30%, піша The Guardian.

Летась арганізацыя Cats Protection дапамагла 184 000 катам — гэта прыкладна 500 жывёлінам за дзень. Цяпер жа кампанія пачала тэрміновы збор ахвяраванняў, бо яе супрацоўнікі змагаюцца з ростам адмоваў ад жывёл.

"Кідаючы катоў, мы падвяргаем іх вялікай небяспецы. Цяпер кінутыя каты галодныя і напалоханыя", — сказаў Майк Эліят, дырэктар па дабрабыце ў Cats Protection. Ён таксама паведаміў, што за першыя шэсць месяцаў года на ветэрынарнае лячэнне выдаткавалі 50 000 фунтаў стэрлінгаў.

Британцы бросают своих кошек, а Обама зачитал рэп — #ИхНравы

Брытанцы адмаўляюцца ад катоў / pixabay.com

Рост колькасці бяздомных катоў адбываецца на фоне росту ўвагі да кошту ўтрымання хатніх жывёл.

У цэлым жа колькасць уладальнікаў катоў у Вялікабрытаніі скарачаецца: цяпер папуляцыя хатніх жывёл складае каля 10,6 млн, год таму іх было 11 млн.

У бібліятэку Нью-Джэрсі вярнулі кнігу, якую ўзялі 100 гадоў таму

У публічную бібліятэку Патэрсана ў Нью-Джэрсі вярнулі кнігу, якую выдалі 101 год таму. Пра гэта піша агенцтва UPI.

Арлін Дэлей узяла ў бібліятэцы кнігу "Жыццё караля Генрыха Пятага" Уільяма Шэкспіра ў 1923 годзе. Кнігу нядаўна знайшла яе ўнучка, Сінція Дэлей, разбіраючы рэчы сваёй памерлай бабулі. Дзяўчына звязалася з бібліятэкай і дамовілася пра вяртанне.

Коры Флемінг, дырэктар бібліятэкі, адзначае, што ўпершыню сутыкаецца з такой сітуацыяй за 20 гадоў працы, і дадае, што ніколі не позна вярнуць пратэрмінаваныя бібліятэчныя матэрыялы.

Асобнік лічыцца вельмі рэдкім: выданне, выпушчанае ў 1910 годзе, мела абмежаваны тыраж, таму высока цэніцца сярод калекцыянераў.

Хоць у бібліятэцы прынята штрафаваць за пратэрміноўку, гэтым разам вырашылі абысціся без штрафу.

Тысячагадовыя манеты прадалі за $5,6 млн

На фермерскім полі ў Вялікабрытаніі знайшлі калекцыю старадаўніх срэбных манет нарманскай эпохі, яны праляжалі ў зямлі амаль тысячу гадоў. Іх прадалі за $5,6 млн, паведамляе Associated Press.

Група археолагаў-аматараў пад кіраўніцтвам Адама Стэйплса знайшла 2584 срэбныя пені яшчэ ў 2019 годзе ў Сомерсэце на паўднёвым захадзе Англіі з дапамогай металашукальнікаў. Манеты былі адчаканеныя ў перыяд з 1066 да 1068 года.

Тысячагадовыя манеты / AP

На некаторых з іх выяўлены Вільгельм I Заваёўнік, а на іншых — яго пераможаны папярэднік англасаксонскага паходжання Гаральд II.

Калекцыю манет набыў мясцовы фонд аховы культурнай спадчыны South West Heritage Trust за $5,6 млн. Палову гэтай сумы атрымала група археолагаў, а другую — землеўладальнік, на чыёй тэрыторыі былі знойдзеныя манеты.

Адзначаецца, што скарб стаў самым каштоўным з калі-кольвек знойдзеных у Вялікабрытаніі. У лістападзе калекцыю прадставяць у Брытанскім музеі, потым яна адправіцца ў выставачнае турнэ, а пасля зойме пастаяннае месца ў экспазіцыі Музея графства Сомерсэт.

Барак Абама закасіў пад Эмінема на мітынгу ў падтрымку Харыс

Былы прэзідэнт ЗША Барак Абама прадэманстраваў свае музычныя таленты падчас перадвыбарчага мітынгу віцэ-прэзідэнткі Камалы Харыс у Дэтройце. Ён прачытаў рэп у яе падтрымку, паведамляе Rolling Stone.

Барак Абама выйшаў да трыбуны пасля выступу рэпера Эмінема. Экс-прэзідэнт прызнаўся, што, хоць і ўдзельнічаў у многіх мітынгах, ён хвалюецца выступаць пасля такой зоркі.

"Я заўважыў, як у мяне змакрэлі далоні, калені дрыжаць, рукі цяжкія, на швэдры ваніты ад мамчыных спагеці", — працытаваў Абама радкі з трэка Эмінема Lose Yourself пад захопленыя крыкі натоўпу (па-англійску: “His palms are sweaty, knees weak, arms are heavy, there's vomit on his sweater already, mom's spaghetti”).