Цэнзура не прапусціла ліст Мікалая Статкевіча пра Майдан
Палітвязень напісаў свайму брату, які жыве ва Украіне, ліст пра Майдан і стасункі Украіны з Расіяй.
Але гэты ліст з турмы ў Магілёве, дзе трымаюць былога кандыдата ў прэзідэнты, так і не выйшаў. Пра гэта ў гутарцы з Радыё "Свабода" паведаміла жонка палітвязня Марына Адамовіч.
Калі цэнзура спыняе нейкі ліст, вязню могуць вярнуць пусты канверт. Так і адбылося з лістом Міколы Статкевіча да брата ва Украіну. Такім чынам вязень даведаўся пра лёс свайго ліста пра Майдан. Што менавіта напісаў пра падзеі ў Кіеве Мікалай Статкевіч, жонка, аднак, не ведае.
Мікалай Статкевіч асуджаны на 6 гадоў зняволення нібыта за арганізацыю масавых беспарадкаў 19 снежня 2010 году. Гэта самы вялікі тэрмін з тых, што атрымалі ўдзельнікі Плошчы ці былыя кандыдаты ў прэзідэнты. Палітвязня трымаюць у крытай турме ў Магілёве. Днямі ў яго скончылася палова тэрміна.
Фота — Reuters
