Чыпсы "18+": дзеці пакаштавалі самыя вострыя чыпсы ў свеце і трапілі ў бальніцу

Чатырнаццаць японскіх старшакласнікаў трапілі ў бальніцу праз занадта вострыя чыпсы, піша ВВС.

Закуску прынёс у школу іх аднакласнік. Неўзабаве некаторыя з дзяцей, што пакпштавалі чыпсы, пачалі скардзіцца на млоснасць і востры боль.

На сайце кампаніі змяшчаецца шмат папярэджанняў для патэнцыйных пакупнікоў. Сярод іх забарона на ўжыванне гэтых чыпсаў людзьмі, маладзейшымі за 18 гадоў. Нават тых, хто любіць вострую ежу, просяць з асцярожнасцю спрабаваць гэтую закуску.

"Чыпсы настолькі вострыя, што могуць зрабіць вам балюча", — гаворыцца ў папярэджанні кампаніі.

Настолькі вострымі закуску робіць "прывідны перац", які вырошчваюць на паўночным усходзе Індыі. Ён вядомы як адзін з самых вострых перцаў у свеце.

Кампанія —вытворца чыпсаў выбачылася перад пакупнікамі за "прынесеныя нязручнасці" і пажадала студэнтам хутчэйшага выздараўлення.