Двое дзяцей нелегальных мігрантаў трапілі ў Літве ў рэанімацыю
У Літве ў рэанімацыю трапілі двое дзяцей нелегальных мігрантаў, якія прыйшлі з Беларусі, піша delfi.lt.
Яны перайшлі мяжу з Беларусі зранку ў чацвер, 22 ліпеня. Бацькі расказалі памежнікам, што перад пераходам дзецям далі нейкія таблеткі, каб яны былі спакойнымі і не перашкаджалі пераходу мяжы. Таблеткі далі людзі ў масках, якія праводзілі нелегалаў да мяжы з Літвой.
Яшчэ адну таблетку далі бацькам: яны мусілі даць яе дзецям падчас пераходу па тэрыторыі Літвы. Гэтую таблетку памежнікі перадалі лекарам.
"Дзеці былі млявымі, не маглі кантактаваць. Памежнікі выклікалі хуткую. Лекары павезлі дзяцей у Алітускую лякарню і змясцілі ў рэанімацыю", — гаворыцца ў паведамленні літоўскіх памежнікаў.
Цяпер стан дзяцей ацэньваецца як стабільны, іх жыццю нічога не пагражае.
Ад пачатку года з Беларусі ў Літву незаконна перайшлі мяжу 2300 мігрантаў. Літоўскія палітыкі заявілі, што гэта гібрыдная вайна з боку афіцыйнага Мінска.
