Дземідзенку і Крамянецкаму на 5 год забаранілі ўезд ва Украіну (абноўлена)
Маладафронтаўцы накіроўваліся на Майдан. Цяпер іх трымаюць на мяжы.
Пра інцыдэнт Еўрарадыё паведаміў сам Мікола Дземідзенка. У 8.30 раніцы 22 лютага яго з паплечнікам Змітром Крамянецкім затрымалі на мяжы з Украінаю ўкраінскія памежнікі (Дземідзенка напісаў у смс назву горада Овруч) і паведамілі, што яшчэ месяц таму вынесеная пастанова аб забароне ім уезда ва Украіну на 5 год.
У гэтыя хвіліны хлопцаў трымаюць “у нейкай будцы на мяжы”, як паспеў удакладніць Мікола Дземідзенка.
Адзіная магчымая прычына такой забароны — ад пачатку падзеяў на Майдане Дземідзенка і Крамянецкі ўжо двойчы пабылі там. Пасля таго, як падзеі трагічна абвастрыліся, яны вырашылі зноў ехаць у сталіцу Украіны, каб падтрымаць герояў Майдана ў іх змаганні.
Як паведаміў Мікола Дземідзенка аб 11.30, іх вывезлі на тэрыторыю Беларусі ў Новую Рудзь і цяпер трымаюць на памежным пункце ў чаканні прыезду міліцыі.