Еўропа пераходзіць на зімовы час: расклад цягнікоў і авіярэйсаў мяняецца
Еўропа ў гэтыя выходныя пераходзіць на зімовы час. У ноч на нядзелю гадзіннікі перавядуць на гадзіну назад. Гэта дазваляе крыху павялічыць перыяд, калі актыўнасць людзей прыпадае менавіта на светлавы дзень.
Зімовы час уводзяць ва ўсіх суседніх з Беларуссю краінах, апроч Расіі. Цяпер розніца ў часе паміж Мінскам і Кіевам, Вільняй, Рыгай будзе адна гадзіна, а паміж Мінскам і Варшавай — дзве гадзіны.
На зімовы час пераводзяць расклады цягнікоў і авіярэйсаў — пасажырам варта быць пільнымі, каб не пераблытаць час адпраўлення або вылету.
Беларусь перастала пераходзіць на зімовы час у 2011 годзе ўслед за Расіяй. Вяртанне да сезонных пераводаў гадзіннікаў пакуль не абмяркоўваецца.
