Фота беларускі трапіла на сайт Vogue. Гэты здымак павінен вас напалохаць

Фатаграфія беларускі Дар'і Роскач трапіла на сайт Vogue. Нас уразіў здымак пясчанага воблака, якое павісла ў пачатку вясны над сакурай у квецені ў Вільні.

А мусіў не ўразіць, а напалохаць.

Дар’я скончыла ўніверсітэт па спецыяльнасці “Геаграфія. Ахова прыроды”. І цяпер, калі яна зачапіла вашае вока прыгажосцю сакуры і магічным словам Vogue, яна навучыць вас… сартаваць смецце.

Радаваліся сакурам у пачатку вясны, цяпер злуёмся на снег у красавіку

Калі Дар’я дасылала здымак на сайт Vogue, яна тлумачыла ў апісанні, якую небяспеку нясе гэтая прыгажосць. Але… тлумачэнне на сайт не трапіла, таму Дар’я асобна тлумачыць значэнне гэтага здымка для Еўрарадыё:

— Мы мусім разумець, калі зроблены здымак і дзе. А зроблены ён у Вільні ў пачатку красавіка. У той самы дзень, калі было +29 градусаў. Гэта нармальная ліпеньская тэмпература, але зусім не красавіцкая. Сакура ў Вільні не павінная цвісці так рана. Нават на японскіх выспах яна пачынае цвісці толькі цяпер.

А цяпер у Вільні ў мяне за акном — снег. І гэтыя моцныя халады настолькі ж ненармальныя, як тая спёка ў пачатку красавіка.

Калі мы не ведаем прыродных законаў, мы спачатку моцна радуемся — о, ранняя вясна! А пасля моцна злуёмся, калі да траўня сакуры ўжо адцвілі і прыйшоў такі холад, што не хочацца носа высоўваць на двор.

І атрымліваецца, што фотаздымак прыгожы, але паказвае, як мы сваёй дзейнасцю ўплываем на прыроду. І калі не будзем сябе стрымліваць, гэтыя змены будуць уплываць найперш на нас саміх, на людзей. Першымі гэта адчуваюць тыя, чый арганізм рэагуе на змены ў надвор’і.

А прыродзе што? Прырода ўсё верне на свае месцы. Калі чалавецтва знікне, — змрочна жартуе Дар’я.

Як было зробленае фота для сайта Vogue

Калі ў Вільні пачынаюць цвісці сакуры, усе, літаральна ўсе жыхары горада выходзяць на двор. Некаторыя нават сваё працоўнае месца пераносяць пад сакуру. Іншыя бяруць выходныя на працы ці раней забіраюць дзяцей з садкоў і школ, каб паказаць ім прыгажосць.

Дар’я ўзяла з сабою партрэтны аб’ектыў, сяброў — і планавала нарабіць ім прыгожых здымкаў. Але разам з партрэтамі атрымаўся і экаактывісцкі здымак.

Насамрэч трапіць на сайт Vogue можа любы фатограф — не трэба ніякіх “сувязяў”, толькі добры здымак і настойлівасць. Кожны панядзелак часопіс адкрывае прыём здымкаў, які пачынаецца зранку і заканчваецца ўвечары. Дар’я два месяцы кожны тыдзець пачынала з таго, што дасылала свае фота рэдактарам сайта.

Ніякіх ганарараў ці фідбэку ад Vogue аўтары ўдалых здымкаў не атрымліваюць.

Мы папрасілі Дар’ю паказаць іншыя фота, якія цягам гэтых месяцаў спрабавалі трапіць у Vogue, але (пакуль) не здолелі. Напрыклад, у той жа дзень, што і пясчанае воблака над сакурай, яна сфатаграфавала дзяўчыну, што ў віленскім садзе разлівала каву. Ні яе імені, ні гісторыі Дар’я не ведае.

— Гэта выпадковае фота, проста яна прыйшла туды і рабіла там каву, запрашала на гэтую каву ўсіх ахвочых. Насамрэч у час, калі квітнеюць сакуры, тут шмат такога. Хтосьці нават сталы прыносіў, заслаў іх абрусамі, і людзі пілі гарбатку за гэтымі сталамі. Хтосьці пікнік ладзіў, хтосьці проста шпацыраваў між сакурамі.

А на гэтым здымку спявачка Кацярына Ваданосава ў беларускім традыцыйным строі. Дар’і вельмі б хацелася, каб аудыторыя сайта з сусветным імем пабачыла прыгажосць беларускага нацыянальнага строю — і прыгажосць уласна гэтай жанчыны.

Дарэчы, сёння панядзелак, і ранкам Дар’я зноў адправіла здымкі на сайт Vogue. І на адным з іх — зноў Кацярына Ваданосава.

А гэта — хатка Дар’інай бабулі. Яна таксама “праходзіла пробы” ў Vogue. І для Дар’і было б асабліва важна, калі б рэдактары выбралі менавіта гэтае фота.

Перад тым як Vogue прыняў “Сакуру”, Дар’я адправіла рэдактарам сайта каля 10 здымкаў.

“Пакецік трэба?” — “Не, дзякуй”

Каб наступным здымкам Дар’і ў Vogue не стала чарговая прыродная дэвіяцыя — давайце сартаваць смецце. Ну, хаця б гэта.

— Давайце сачыць за сабой і хоць трошкі зніжаць свае ж уласныя адкіды. Каб людзі маглі трошкі даўжэй пажыць на гэтай планеце.

Сартаванне смецця і адмова ад пластыкавай упакоўкі — гэта тое, што можа рабіць літаральна кожны. Не скідвайце смецце ў адзін кантэйнер, пачытайце, што і як сартуецца ў вашай краіне. І нават калі пакуль не вельмі сартуецца — спрабуйце ўводзіць гэтую культуру. Шмат у якіх краінах гэта можна прапіхваць.

У Вільні з сартаваннем усё вельмі проста, і ў Беларусі таксама проста. Калі ў вас ля дома няма сартавальных бакаў — напішыце запыт у службы, і іх ахвотна вам паставяць.

Адмаўляйцеся ад “пакецікаў” на рынках — складайце гародніну ў палатняную торбачку. Ці хаця б выкарыстоўвайце тыя пакецікі, якія вам далі, па некалькі разоў.

— Для штодзённых паездак абірайце не асабісты, а грамадскі транспарт. А яшчэ лепш — ровары. І так патрошку мы будзем зніжаць ціск на наваколле. Дарэчы, сёння ж яшчэ і Дзень Зямлі! — прыгадвае Дар’я пад канец інтэрв’ю. — Удала мы пагутарылі.