Галоўчанка на Менцы паглядзеў на "глыбіню нацыянальнай гісторыі Беларусі"

11 кастрычніка прэм'ер-міністр Раман Галоўчанка прыехаў на Менку ў Мінскім раёне паглядзець на "глыбіню нацыянальнай гісторыі Беларусі" (Лукашэнка ў гэты час займаўся кукурузай). Менавіта з яго ініцыятывы там некалькі гадоў праводзяцца самыя маштабныя археалагічныя даследаванні ў нашай краіне. Раскопкі павінны былі пацвердзіць, што летапісны Менск знаходзіўся менавіта там. І навукоўцы не падвялі. Дырэктар Інстытута гісторыі Нацыянальнай Акадэміі навук Беларусі Вадзім Лакіза аб'явіў, што драўніна з асновы вала гарадзішча на рацэ Менка адносіцца да Х стагоддзя: "...Такіх і такога ўзросту знаходак на тэрыторыі Усходняй Еўропы сёння больш няма!". Там плануюць стварыць музейны комплекс. Гэта пацвердзіў прэм'ер і паабяцаў знайсці фінансаванне.

Галоўчанка прыехаў у кампаніі кіраўніка Акадэміі навук, міністраў адукацыі і культуры. Яму расказалі пра вынікі раскопак і самыя важныя знаходкі. Асноўны план на 2025 год — пацвердзіць наяўнасць на тэрыторыі гарадзішча хрысціянскага храма, магчыма, аднаго з самых старажытных на тэрыторыі Беларусі.

Першая згадка пра Мінск датуецца сакавіком 1067 года. Тады кіеўскія князі ваявалі з полацкім князем Усяславам Чарадзеем і спалілі летапісны Менск. Мяркуецца, што ў той час горад быў на рацэ Менцы ў раёне вёскі Гарадзішча ў Мінскім раёне.