Гісторыя з міліцэйскім УАЗам у Мазыры: яго падпаліў затрыманы

Мазырскі райаддзел Следчага камітэта пачаў крымінальную справу за наўмыснае знішчэнне або пашкоджанне маёмасці, здзейсненыя агульнанебяспечным спосабам. Падазраваным па спарве праходзіць жыхар Мазыра, які падпаліў службовы аўтамабіль РАУС, перадае прэс-служба Следчага камітэта.

Здарэнне адбылося 18 лістапада. 57-гадовага мазырчука затрымалі за дробнае хуліганства ў аўтобусе і даставілі ў РАУС. У пастарунку мужчына працягваў скандаліць і нават стукнуў супрацоўніка міліцыі.

Пасля гэтага мужчыну на службовым аўтамабілі "УАЗ-3163015" адвезлі ў медустанову, каб праверыць стан алкагольнага ап'янення. На зваротным шляху затрыманы дастаў з ручной паклажы бутэльку, у якой была лёгказагаральная вадкасць. Ён выліў вадкасць і падпаліў. 

Аўтамабіль загарэўся. Агонь знішчыў і пашкодзіў значныя часткі салона і кузава аўтамабіля, а таксама маёмасць у ім. Сам затрыманы атрымаў апёкі.

Цяпер мазырчук знаходзіцца на лячэнні ў бальніцы.