Італьянцы спрабавалі ўсынавіць 200 беларускіх дзяцей. Вось чаму нічога не выйшла

10/10/2023 - 14:10

Італія / pixabay

Дзвесце італьянскіх сем'яў не могуць завяршыць працэдуру ўсынаўлення беларускіх дзяцей, піша мясцовае выданне Il Restodelcarlino.

У 2020 годзе тагачасны прэм'ер Італіі Джузэпэ Контэ адмовіўся падпісаць спецыяльны гарантыйны ліст, у якім мусіў быць спіс тых, хто ўсынаўляе дзяцей. Не праз шкадлівасць — а таму, што ЕС не прызнаў Аляксандра Лукашэнку прэзідэнтам Беларусі. Але паколькі Беларусь не атрымала ліста, працэс усынаўлення заблакавалі.

Італьянскія сем'і, якія спрабавалі дамагчыся завяршэння працэдуры, патрабавалі ад свайго ўрада вырашыць праблему. І ў красавіку 2021 года Італія ўсё ж накіравала Беларусі патрэбны ліст — але за подпісам тагачаснага міністра па справах сям'і Элены Банэці, а не прэм'ер-міністра Контэ.

"Але для Беларусі ліст, не падпісаны Контэ, — не больш чым макулатура", — піша італьянскае выданне.

Зрэшты, італьянскія журналісты кажуць, што ў беларускіх дзяцей і іх італьянскіх сем'яў усё яшчэ ёсць надзея. Гарантыйны ліст, які тры гады таму не падпісаў Контэ, цяпер ляжыць на стале дзейнай прэм'ер-міністаркі Італіі Джорджы Мэлоні.

Італьянцы змагаюцца за магчымасць усынавіць беларусаў

Асацыяцыя Adozioni Alfabeto, якая кантактуе з сем'ямі, што распачалі працэдуру ўсынаўлення, звярталася ў Дзяржаўны савет (судовы орган у Італіі). Але там падтрымалі пазіцыю экс-прэм'ера: Адмова ад падпісання ліста, які дае зялёнае святло ўсынаўленню — палітычны акт, і ўрад мае на яго права.

Юрыст асацыяцыі Даніэле Дорсі кажа, што гэты пратакол змяшчае проста працэсуальныя палажэнні, а значыць, Італія можа падпісаць гэта гарантыйны ліст — і палітычным жэстам подпіс прэм'ера не будзе:

"Існуюць мемарандумы аб узаемаразуменні пры ўсынаўленні нават з такімі краінамі, як Кітай, які, як вядома, не з'яўляецца дэмакратычнай краінай".

Вынік: замест дапамогі беларускім дзецям — ровары для мараканскіх

Тым часам па ўсёй Італіі закрываюцца рэгіянальныя асацыяцыі, якія займаліся арганізацыяй паездак беларускіх дзяцей на летнія і калядныя канікулы ў Італію.

Лусіла Баргарэла разам з мужам Альберта Карсані прымала ў гасцях маленькіх беларусаў з 2000 года.

"І ў 2019 годзе мы бачылі нашых гасцей апошні раз — прыйшла пандэмія, а потым вайна... Мы нават не змаглі з імі як след развітацца", — кажа Лусіла.

Гэтая сям'я ўпершыню прыняла тых, хто мае патрэбу ў дапамозе ў 1996 годзе — і тады гэта былі не беларусы, а баснійцы. Калі ў Босніі і Герцагавіне пачалася вайна, Лусіла збірала грошы, каб прытуліць у сябе дома баснійскую маці з двума дзецьмі. А калі канфлікт скончыўся і госці змаглі вярнуцца дадому, у італьянскай сям'і ўсё яшчэ заставалася трохі грошай на тое, каб дапамагчы іншым. І яны вырашылі дапамагчы маленькім беларусам.

Спярша Лусіла думала, што беларускія дзеці прыедуць да яе ўсяго раз — але гісторыя расцягнулася на гады.

"Мы давалі канцэрты, прадавалі амялу на Каляды — і так збіралі каля 12 000 еўра за год. Гэтага было дастаткова, каб кампенсаваць большую частку выдаткаў сем'яў, якія прымалі ў сябе ў гасцях беларускіх дзяцей. У гэтую суму ўваходзілі і візіты да дактароў, якіх дзеці наведвалі ў Італіі, і, напрыклад, купля акуляраў для дзяцей", — успамінае італьянка.

На дзень закрыцця на балансе асацыяцыі было 13 тысяч еўра. Выдаткаваць гэтыя грошы на беларускіх дзяцей, як было запланавана, сем'і ўжо не могуць. Таму яны адправілі іх на дапамогу дзецям у іншых частках свету: напрыклад, купілі ровары для школьнікаў з бедных вёсак Марока.

Каб сачыць за галоўнымі навінамі, падпішыцеся на канал Еўрарадыё ў Telegram.

Мы штодня публікуем відэа пра жыццё ў Беларусі на Youtube-канале. Падпісацца можна тут.