Літва хоча перанесці склады з запасамі прадуктаў і паліва далей ад Беларусі

Да 2027 года Літва плануе перанесці склады, на якіх захоўваюцца аварыйныя запасы прадуктаў харчавання, паліва і іншых тавараў, далей ад мяжы з Беларуссю.

Пра гэта паведаміў Нацыянальны цэнтр па кіраванні крызіснымі сітуацыямі Літвы, піша мясцовае выданне LRT.

Больш за палову запасаў, якія захоўваюцца на складах паблізу беларускай мяжы, ужо перавезены ў цэнтральную частку Літвы. Да 2027 года ў цэнтральнай і паўночнай частках краіны плануюць пабудаваць яшчэ два новыя склады, каб адвезці туды астатнюю частку запасаў.

Дзяржаўны рэзерв выкарыстоўваецца ў надзвычайных або крызісных сітуацыях, а таксама ў выпадку мабілізацыі, абвяшчэння надзвычайнага становішча або вайны.

Дакладныя месцы захоўвання запасаў, а таксама іх колькасць з’яўляюцца сакрэтнай інфармацыяй.