Малдаўскі спартовец хацеў трапіць у Беларусь па чужым пашпарце
У пункце пропуску "Новая Гута" 3 студзеня памежнікі затрымалі адразу траіх парушальнікаў.
Яны спрабавалі перасячы мяжу як па чужых, так і па падробленых дакументах, паведамляе БелаПАН.
Так, грамадзянін Малдовы ехаў у складзе групы на тэрыторыю Беларусі для ўдзелу ў спартовых зборах. У яго быў пратэрмінаваны пашпарт, які спартовец схаваў у асабістых рэчах. Перасякаць мяжу вырашыў па пашпарце знаёмага, аднак памежнікі заўважылі падробку.
Яго 39-гадовая суайчынніца хацела трапіць у Расію па пашпарце сястры. Па словах жанчыны, свой пашпарт яна страціла, а рабіць новы не было часу.
Яшчэ адна жанчына збіралася трапіць ва Украіну па расійскім пашпарце, у якім была замененая старонка з установачнымі данымі. Як высветлілася падчас праверкі дакумента, старонка была аддрукаваная на струмянёвым прынтары. Як растлумачыла затрыманая, дакумент яна атрымлівала праз сваякоў і пра тое, што пашпарт часткова падроблены, не ведала.
Фота — interfax.by