"Маленькі прынц" на аўкцыёне і самы страшны фільм жахаў у свеце — #ІхНоравы

Лонданскія букіністы выставілі на продаж унікальную копію "Маленькага прынца". Святары Грэцыі гадамі ўкладаліся ў працу начных клубаў. Штучны інтэлект навучыўся дыягнаставаць сардэчныя хваробы. Навуковым шляхам вызначаны самы страшны фільм сучаснасці.

Пра ўсё гэта падрабязней — у нашай традыцыйнай рубрыцы "Іх норавы".
 

Копію кнігі "Маленькі прынц" выставяць на таргі за казачную суму

Рэдкі экзэмпляр машынапісу “Маленькага прынца" Антуана дэ Сент-Экзюперы выставяць на продаж у лістападзе. Гэта адна з трох вядомых копій арыгінальнага тэксту, і ўпершыню ў гісторыі машынапісны варыянт легендарнага твора прапанаваны для публічнага продажу. Чакаецца, што стартавы кошт лота складзе не менш за 1,25 мільёна долараў (1,15 мільёна еўра).

Лонданскі букіністычны магазін Peter Harrington прадставіць тэкст з праўкамі і малюнкамі аўтара на фестывалі мастацтваў у Абу-Дабі. 

Гэты ўнікальны экзэмпляр уключае ўрыўкі, якія не ўвайшлі ў канчатковую версію. Разам з ім будзе выстаўлены пашпарт Сент-Экзюперы, выдадзены Міністэрствам культуры Францыі. 

Машынапісны тэкст быў створаны ў Нью-Ёрку, калі Сент-Экзюперы быў у эміграцыі, і ўключае знакамітую фразу: "Відушчае толькі сэрца. Самага галоўнага вачыма не ўбачыш".

Паводле эксперта Сэмі Джэй, адзін з трох вядомых экзэмпляраў машынапісу захоўваецца ў Нацыянальнай бібліятэцы Францыі, другі — у Цэнтры Гары Рэнсама ў Тэхасе. Гэты ж асобнік быў рабочай версіяй аўтара, што робіць яго яшчэ больш унікальным. 

Рынак рэдкіх кніг ацэньвае такія лоты вельмі высока, адзначаючы іх выключную рэдкасць і гістарычную каштоўнасць. "Маленькі прынц", апублікаваны ўпершыню ў ЗША ў 1943 годзе, застаецца адной з самых перакладаных кніг у свеце, саступаючы ў папулярнасці толькі рэлігійным тэкстам.
 

Грэцкія святары інвеставалі царкоўныя грошы ў працу начных клубаў

Грэцкая пракуратура расследуе справу аб крадзяжы 3 мільёнаў еўра, да якога могуць быць датычныя сем чалавек. Як паведамляюць улады, сродкі пераводзіліся пад выглядам інвестыцый на працягу васьмі гадоў.

Сярод падазраваных — два высокапастаўленыя прадстаўнікі каталіцкай царквы ў Грэцыі, якія, як сцвярджаецца, выкарыстоўвалі царкоўныя грошы для ўкладанняў у начныя клубы.

Гэтую інфармацыю пацвердзіла антыкарупцыйнае ведамства Грэцыі.

У рамках расследавання ўжо замарожаныя банкаўскія рахункі і актывы пяці ўладальнікаў начных клубаў. Як піша мясцовая прэса, першыя падазроныя пераводы ў адрас прыватных асоб, замаскіраваныя пад звычайныя інвестыцыі, датуюцца васьмю гадамі таму. Апошні падазроны перавод на суму 50 тысяч еўра быў зроблены літаральна некалькі дзён таму.

Справа, якая пачалася як планавая праверка, была перададзеная ў пракуратуру для далейшага крымінальнага расследавання. У найбліжэйшы час семярых фігурантаў выклічуць на допыт па падазрэнні ў крадзяжы і адмыванні сродкаў. 

У адказ на абвінавачанні Каталіцкая царква Грэцыі заявіла ў чацвер, што не ведала пра дзеянні падазраваных святароў і чакае афіцыйнага паведамлення ад уладаў, каб заняць афіцыйную пазіцыю ў гэтай справе.
 

Штучны інтэлект навучыўся выяўляць хваробы сэрца

Даследчыкі паведамілі, што іх мадэль на базе штучнага інтэлекту, якая здольная прагназаваць рызыкі заўчаснай смерці, можа быць карыснай для пацыентаў з сардэчнымі захворваннямі. 

Новы інструмент ШІ, распрацаваны для выяўлення пацыентаў з высокай рызыкай, неўзабаве пачне тэставанне ў Англіі пасля паспяховага даследавання. 

Яно паказала высокую дакладнасць прагназавання рызыкі смерці на працягу некалькіх гадоў пасля кардыялагічнага абследавання.

Распрацаваная міжнароднай камандай даследнікаў з Імперскага каледжа Лондана, мадэль AI-ECG (AIRE) навучалася на мільёнах вынікаў электракардыяграм (ЭКГ).

Пры тэставанні мадэль змагла прадказаць імавернасць смерці на працягу дзесяцігоддзя пасля ЭКГ з дакладнасцю 78%. 

"Мы верым, што гэта можа прынесці значныя перавагі як для NHS, так і ў міжнародным маштабе", — адзначыў доктар Фу Сіёнг Нг, які ўдзельнічаў у праекце. Мадэль таксама можа прадказваць сардэчныя прыступы, сардэчную недастатковасць і арытмію. 

Чакаецца, што ў найбліжэйшыя пяць гадоў сістэма будзе інтэграваная ў Нацыянальную службу аховы здароўя Вялікабрытаніі. Пачатак першых клінічных выпрабаванняў на пацыентах плануецца ў Лондане да сярэдзіны 2025 года.

ШІ-ЭКГ ужо выкарыстоўвалася для дыягностыкі сардэчных захворванняў, аднак яшчэ не стала часткай паўсядзённай медыцыны і не прымянялася для ацэнкі рызыкі ў канкрэтных пацыентаў. 

Паводле прафесара Браяна Уільямса, галоўнага навуковага супрацоўніка Брытанскага фонду сэрца, гэтае адкрыццё можа значна пашырыць магчымасці прымянення ЭКГ, дапамагаючы ацэньваць не толькі цяперашні стан, але і рызыкі для здароўя і жыцця. 

Навукоўцы прызнаюць, што для паўнавартаснага ўкаранення мадэлі ў медыцыну неабходныя далейшыя даследаванні. Але ўжо цяпер ясна, што яна здольная выяўляць змены ў структуры сэрца, якія могуць заставацца незаўважанымі пры звычайным аглядзе.
 

Навукоўцы высветлілі, які з сучасных фільмаў жахаў самы страшны

Падчас даследавання "Навукі жаху" быў складзены рэйтынг самых страшных хорараў з апорай на частату сардэчных скарачэнняў (ЧСС) гледачоў. 

Праект, які праводзіцца ўжо чацвёрты год, сочыць за пульсам 250 добраахвотнікаў падчас прагляду фільмаў жахаў на англійскай мове, фіксуючы сярэднія паказчыкі частаты сардэчных скарачэнняў (ЧСС) і яе ваганні. 

Лідарам гэтага года стала стужка “Сіністэр" Скота Дэрыксана (2012): у гледачоў падчас прагляду ЧСС узрастала на 34%, з 64 да 86 удараў у хвіліну, а падчас самых страшных сцэн дасягала 131 удару ў хвіліну. 

Гэтыя дадзеныя далі фільму рэкордны "страшны рэйтынг" 96 з 100.

У выніку ў топ-20 таксама ўвайшлі фільмы "Хост", "Паранармальная з'ява. Скінамарынк", "Астрал", "Заклён", "Рэінкарнацыя" і іншыя, пераважна сучасныя, карціны.

Адзіная навінка 2024 года — ірландскі звышнатуральны трылер Дэміяна Макарці "Астрал. Медыум", які апавядае пра сляпога медыума, што расследуе смерць сваёй сястры-блізняці.

Гэты фільм увайшоў у спіс найлепшых і атрымаў прэмію "Срэбны Мельес" як найлепшы еўрапейскі фільм на фестывалі MotelX у Лісабоне.

Цікава, што даследаванні паказалі значны ўплыў рэзкіх момантаў (jump scares) на ЧСС гледачоў. Аднак крытыкі адзначаюць, што выкарыстанне гэтага прыёму не заўсёды паляпшае якасць аповеду і часта выглядае як танны спосаб выклікаць страх.

Хоць метадалогія рэйтынгу "Навукі жаху" заснаваная на фізічных рэакцыях гледачоў, абмеркавання паказваюць, што не кожны фільм, які выклікае рэзкі скачок пульсу, можна лічыць "самым страшным".

Як адзначаюць эксперты, фільмы, якія ўмела выкарыстоўваюць напружанне і ўтрымліваюць працяглы страх, застаюцца ў памяці надоўга. 

Рэдкія і па-майстэрску выкананыя рэзкія моманты, як у класічных сцэнах "Псіха" (1960), "Сківіцах" (1975) або "Сем" (1995), могуць стаць іконай жанру, калі фільм мае добры сюжэт і глыбіню, а не проста танна палохае.