Мінфін не лічыць, што ў Беларусі адбыўся дэфолт, і вось чаму

Мінфін Беларусі не згодны з вердыктам рэйтынгавага агенцтва Moody's, паводле якога ў рэспубліцы адбыўся дэфолт.

На думку спецыялістаў агенцтва, Беларусь зазнала дэфолт, бо прапусціла плацёж па сваіх даляравых аблігацыях. Гаворка пра тое, што санкцыі фактычна адрэзалі краіну ад міжнародных фінансавых рынкаў, і гэта прывяло да таго, што Беларусь тэхнічна не магла заплаціць па аблігацыях. Сума непагашанай запазычанасці склала 22,9 млн даляраў ЗША.

Мінфін заяўляе, што дагаворныя адносіны з Moody's скасаваныя Міністэрствам фінансаў у 2018 годзе. І таму дзеянні Moody's "з'яўляюцца незапрошанымі беларускім бокам". Агенцтва, прымаючы рашэнне, не задала міністэрству ніводнага ўдакладняльнага пытання, гаворыцца ў адказе.

"На нашу думку, у ацэнках прысутнічае прадузятасць, агенцтва дакладна і прадказальна трымаецца генеральнай лініі па абыгрыванні дэфолту. Пазіцыі беларускага суверэннага эмітэнта і ўладальнікаў еўрабондаў, якія не атрымалі ў лютым выплаты па еўрабондах праз дзеянні заходніх разлікова-клірынгавых сістэм, нікога не цікавяць", — гаворыцца ў заяве міністэрства.

Беларусь хоча заплаціць, але не можа

У Мінфіне дадалі, што заходнія санкцыі пазбаўляюць інвестараў магчымасці атрымліваць свае выплаты па еўрааблігацыях. Беларускі ж бок робіць намаганні, каб гэтыя правы ўладальнікаў еўрааблігацый "рэалізаваць на альтэрнатыўнай аснове".

Адна з такіх спробаў "рэалізаваць правы інвестараў на альтэрнатыўнай аснове" — сакавіцкі ўказ Аляксандра Лукашэнкі. Калі Беларусь адрэзалі ад міжнародных фінансавых рынкаў, Лукашэнка дазволіў плаціць па знешніх даўгах у нацыянальнай валюце. А ў тлумачэнні на сайце Міністэрства фінансаў Беларусі было сказана, што закон уводзіцца для павышэння ўнутранай устойлівасці эканомікі ва ўмовах "беспрэцэдэнтнага санкцыйнага ціску".

Аднак некалькі месяцаў таму іншае рэйтынгавае агенцтва, Fitch, папярэджвала, што будзе разглядаць спробу пагасіць знешні доўг у беларускіх рублях як дэфолт.

"Fitch не вядома пра якія-небудзь плацяжы, зробленыя такім чынам. Разлікі па суверэнных еўрааблігацыях павінны адбывацца ў далярах ЗША, а дакументацыя па аблігацыях не дапускае разлікаў у альтэрнатыўных валютах. Fitch будзе разглядаць пагашэнне аблігацый у мясцовай валюце як дэфолт", — гаварылася ў заяве агенцтва.

Абвешчаны сёння дэфолт — гэта, хутчэй, сімвалічная падзея. У такую сітуацыю ў гэтым месяцы трапіла і Расія. Нягледзячы на жаданне і магчымасць заплаціць па рахунках, краіна сутыкнулася з тым, што медыя "абвясцілі" ёй дэфолт. Больш падрабязна пра гэта можна прачытаць тут.