Міністр Шуневіч — пра міліцыянтаў: "Прымушаем і кнігі чытаць"
Журналісты звярнулі ўвагу на нечаканае з'яўленн міністра ўнутраных спраў Ігара Шуневіча на Міжнароднай кніжнай выставе-кірмашы, якая адбываецца гэтымі днямі. Чыноўнік набыў сабе за 83 рублі гістарычны альбом на ўкраінскай мове “Князі Олельковичі-Слуцькі”, жонцы — кулінарную кнігу, дачцэ — развіваючыя кнігі.
"Увогуле, я лічу, што ў будучым мы вернемся да таго, што людзі ўсё больш і больш будуць аддаваць перавагу друкаванаму слову, а не сядзець у інтэрнэце. Сам некалькі разоў спрабаваў чытаць кнігу ў электронным выглядзе, але асалода ад гэтага не тая. Кніга, прабачце за банальнасць, — гэта лепшы сябра і лепшы настаўнік", — патлумачыў міністр..
Карэспандэнт “Народнай Волі” пацікавіўся ў Шуневіча, ці чытае ён беларускамоўную літаратуру. Міністр паведаміў, што некалькі разоў перачытаў паэму Адама Міцкевіча “Пан Тадэвуш”. "Дарэчы, шукаў гэты твор на англійскай мове ды так і не знайшоў. Таму сёння папрасіў міністра інафрмацыі, каб такі пераклад быў зроблены. Гэта быў бы цудоўны падарунак для нашых замежных гасцей", — дадаў ён.
Менш аптымістычна гучаў адказ Шуневіча на пытанне, ці чытаюць яго падначаленыя творы на беларускай мове. "Ведаеце, усё добрае нашым людзям трэба колам убіваць у галаву. Таму, у тым ліку, прымушаем і кнігі чытаць", — прызнаўся міністр унутраных спраў.
Гэтая заява дзіўна супярэчыць словам камандзіра мінскага АМАПа Дзмітрыя Балабы, які расказваў, што пад яго кіраўніцтвам служаць "заўзятыя тэатралы, гісторыкі, знаўцы выяўленчага мастацтва".
