На волю выйшаў адзін з найстарэйшых палітвязняў Беларусі — Васіль Бераснёў
Васіль Бераснёў / facebook.com
На волю па памілаванні выйшаў адзін з найстарэйшых палітвязняў Беларусі — 74-гадовы Васіль Бераснёў, паведамляюць праваабаронцы. Ён быў за кратамі з красавіка 2022 года, быў асуджаны на 9 гадоў калоніі ўзмоцненага рэжыму.
Бераснёў — былы лідар аршанскага незалежнага прафсаюзу РЭП, быў выканаўцам абавязкаў старшыні прафсаюза РЭП. Як вядома, рэжым Аляксандра Лукашэнкі разграміў незалежныя прафсаюзы ў нашай краіне, а іх лідараў кінуў за краты.
Яшчэ падчас знаходжання ў СІЗА ў Васіля Бераснёва значна пагоршыўся стан здароўя: ён пакутаваў ад боляў у адзінай нырцы. Сітуацыя была настолькі крытычная, што медыкаментознае лячэнне не мела сэнсу — патрэбна была перасадка ныркі. Паводле інфармацыі праваабаронцаў, нягледзячы на ціск за кратамі, сур'ёзныя праблемы са здароўем і выхад па памілаванні, Бераснёў так і не прызнаў сваёй віны. Яго абвінавачвалі ва "ўдзеле ў экстрэмісцкім фармаванні", "закліках да дзеянняў, накіраваных на прычыненне шкоды нацыянальнай бяспецы Беларусі", "распальванні сацыяльнай варожасці", "удзеле ў экстрэмісцкім фармаванні" і "стварэнні экстрэмісцкага фармавання".
Праваабаронцам ужо вядомыя прозвішчы 13 вызваленых па памілаванні палітвязняў.
