Надзвычайнае здарэнне з нованароджаным у Салігорску: каментар лекара-гінеколага

Далей чакалі да поўнага раскрыцця маткі. Ніхто не адправіць тужыцца парадзіху пры раскрыцці 3 см, як яна кажа, і не будзе ціснуць адразу. Гэта бязглуздзіца. Я не паверу, што такое магло быць. Так не бывае ў акушэрстве.

Убачылі, што ёсць гіпаксія (стан, пры якім арганізм адчувае недахоп кіслароду) — пабеглі на кесарава. Спосабаў зафіксаваць своечасова гіпаксію не так шмат і ўсе яны вельмі адносныя. Такія сітуацыі маглі быць і без Крыстэлера. Гіпаксія — гэта нярэдкая з'ява, таму казаць з-за гэтага пра крымінал — такі сабе аргумент.

Выцісканне плоду рукамі — так, гэта касяк. Але знайдзіце мне якога-небудзь акушэра-гінеколага ў Беларусі, які ніколі такога не рабіў. У тым ліку, гэта рабіла і кіраўніца камісіі Алена Гашкевіч.

Крыстэлер — гэта тое, чаго быць не павінна. У такой сітуацыі павінны выкарыстоўвацца або шчыпцы, або вакуум.

Чаму не зрабілі кесарава сячэнне адразу?

Для лекара зрабіць кесарава сячэнне — у разы хутчэй, чым штосьці іншае. Але СААЗ б'е трывогу, што шанцы памерці пры кесаравым або пасля яго рэальна ў разы вышэйшыя, чым пры натуральных родах. Даўжэй адбываецца і аднаўленне. Таму казаць, што лекары накасячылі, не зрабіўшы кесарава адразу — няправільна.

Жанчына скардзіцца, што дактары нешта не расказалі сваякам. Але закон пра медычную таямніцу мае на ўвазе падпісаную згоду, каму і што можна казаць. Тут магло быць месца для парушэння медыцынскай этыкі.

Увогуле, акрамя хамства і Крыстэлера ў гэтай сітуацыі буйных касякоў я не бачу.

У радзільным доме жанчына безабаронная

Ці магла парадзіха абараняць сябе падчас родаў, калі адчувала небяспеку? Ніяк. У нашай сістэме жанчына ў родах вельмі ўразлівая. Гэта не пацыент, які выбірае планавую аперацыю. Ёй увесь час баліць, і час на баку персаналу. Ты можаш спрачацца ці крычаць, але толку? Абараніцца ў гэтай сытуацыі рэальна немагчыма. Ну і ад чаго бараніцца? Калі лекары выявілі гіпаксію, яны адразу паляцелі ў аперацыйную. У плане Крыстэлера... ну адзінае што.

На жаль, жанчына безабаронная ў радзільным доме, і гэта рэальная праблема. Партнёрскія роды — гэта адзінае, што крышку страхуе. Але, зноў-ткі, звычайна лекары спрабуюць дапамагчы чалавеку нарадзіць.

Каб вы разумелі, па статыстыцы ў Брытаніі ў 2018 годзе 70% страхавых выплат за памылкі дактароў і ўскладненні прыпадала на акушэрства. Ускладненні і памылкі дактароў былі, ёсць і будуць.

Не павінна быць халатнасці, калі лекары "забіваюць" ці ігнаруюць. Калі да пацыента не падыходзяць, не рэагуюць на яго скаргі — гэта халатнасць і тое, што адбываецца ў нашых радзільных дамах рэгулярна.

Проста ў большасці выпадкаў усё добра сканчаецца, таму дзеці жывыя, матулі здаволеныя, і на непрыемнасці потым усе хутка забываюцца.

А працаваць без ускладненняў немагчыма. Няма ніводнай добрай методыкі (акрамя прамога ЭКГ плоду, але гэта траўматычна), якая дазваляе добра кантраляваць стан дзіцяці, так што ўсё адносна.

Але пры гэтым казаць пра тое, што ў Беларусі ва ўсіх акушэраў і гінеколагаў мара — збіваць людзей і дзеля плану не рабіць кесарава сячэнне... Ды плюньце ў твар такому чалавеку ад майго імя! Робяць кесарава налева і направа — па паказаннях.

У нас сапраўды ёсць праблема нармальнага абязбольвання (хоць у гэтай жанчыны яно было), і яшчэ праблема, што людзям часта не тлумачаць, што з імі адбываецца, а яны не разумеюць.