Пад Гомелем двое бяздомных атруціліся сурагатным алкаголем
Трупы дваіх бяздомных знайшлі ў мінулыя выходныя ў катэджы ў вёсцы Уза пад Гомелем. Мужчына і жанчына спажывалі сурагатны алкаголь, што і стала прычынай іх гібелі. Гэтых людзей прытуліў у сябе гаспадар катэджа: яны жылі ў гаспадарчым збудаванні і ў абмен на дах над галавой і ежу дапамагалі на будоўлі.
Гаспадар дома паведаміў у міліцыю пра здарэнне, як толькі знайшоў целы сваіх работнікаў. Побач з іх трупамі знайшлі таксама дзве бутэлькі з астаткамі вадкасці. Высветлілася, што напярэдадні парачка выпівала сумнеўнай якасці алкаголь. Разам з імі за сталом была яшчэ адна жанчына, але яна адчула сябе блага, выклікала ваніты, чым і выратавала сабе жыццё.
Факт атручэння пацвердзіла судова-медыцынская экспертыза. Цяпер спецыялісты высвятляюць, які менавіта яд утрымліваўся ў сурагатным напоі.
Як піша “Гомельская праўда”, за мінулы год ад спажывання няякаснага алкаголю загінула 14 жыхароў вобласці, яшчэ 240 чалавек — ад вадкасцяў з утрыманнем спірту.
