Пад Масквой мінулай ноччу зноў збілі два беспілотнікі
Абломкі беспілотніка, які ўпаў у Маскве 30 мая / ілюстрацыйнае фота "Коммерсант"
Пад Масквой мінулай ноччу расійскія сілы СПА знішчылі два беспілотныя лятальныя апараты. Пра гэта паведамляе міністэрства абароны РФ. Па дадзеных расійскага ваеннага ведамства, пацярпелых і разбурэнняў няма. Мэр Масквы Сяргей Сабянін удакладніў, што БПЛА былі збітыя ў раёне Дамадзедава і Мінскай шашы. Расійскія тэлеграм-каналы цытуюць мясцовых жыхароў якія скардзіліся, што ад гучных выбухаў у іх "ледзь вокны не выпалі".
У апошнія месяцы ў Маскве і ваколіцах перыядычна з'яўляюцца беспілотнікі. Частка з іх расійскія СПА знішчаюць, але часам дроны дасягаюць мэты. Двойчы гэтым летам была пашкоджана адна з вежаў дзелавога цэнтра "Масква-Сіці" — пацярпеў будынак, у якім размешчаны тры федэральныя міністэрствы. А ў маі беспілотнікі папалі ў жылыя дамы. Адзін з дронаў заляцеў у кватэру шматпавярхоўкі.
Нагадаем, 24 лютага 2022 года Расія напала на Украіну. Яна практычна штодня працягвае абстрэльваць ракетамі ўкраінскія гарады.
Каб сачыць за галоўнымі навінамі, падпішыцеся на канал Еўрарадыё ў Telegram.
Мы штодня публікуем відэа пра жыццё ў Беларусі на Youtube-канале. Падпісацца можна тут.