Палітвязня Дзмітрыя Слука асудзілі на 8 гадоў і 6 месяцаў зняволення
Дзмітрый Слук / t.me/viasna96
Генпракуратура Беларусі паведамляе, што ў судзе Заводскага раёна Мінска (суддзя — Дзмітрый Астапенка) за "фінансаванне тэрарыстычнай дзейнасці" асуджаны на 8 гадоў і 6 месяцаў зняволення і вялікі штраф (больш за 11 тысяч рублёў) 35-гадовы С. У жніўні 2021-га ён падтрымаў данатам нейкую арганізацыю, якую рэжым Аляксандра Лукашэнкі прызнаў "тэрарыстычнай". Сцвярджаецца, што мужчына перавёў крыптавалюту ў суме, якая эквівалентная 2160 доларам.
Праваабаронцы пішуць, што асуджаны — гэта жыхар Бабруйска Дзмітрый Слук. Яго затрымалі 10 лютага 2023-га ў Мінску. Спачатку былі 10 сутак арышту на Акрэсціна, а пасля — крымінальная справа і знаходжанне ў СІЗА № 1. У сакавіку прозвішча Слука з'явілася ў спісе асоб, "датычных да тэрарыстычнай дзейнасці". Тады ж беларускія праваабаронцы прызналі яго палітвязнем.
Дзмітрый Слук не абскарджваў жорсткі прысуд і неўзабаве будзе этапаваны ў адну з калоній.
