Палітзняволенаму экс-амапаўцу прысудзілі за пратэсты тры гады "хатняй хіміі"

Суд Маскоўскага раёна 2 лістапада прысудзіў тры гады "хатняй хіміі" палітвязню Максіму Клімовічу, піша праваабарончы сайт "Вясна".

Мужчыну судзілі паводле артыкула 342 Крымінальнага кодэкса (арганізацыя і падрыхтоўка дзеянняў, якія груба парушаюць грамадскі парадак, або актыўны ўдзел у іх).

9 жніўня 2020 года Клімовіч стаў у счэпцы каля Стэлы, яго апазналі па фатаграфіі.

Мужчына раней служыў у АМАПе, але звольніўся яшчэ ў 2012 годзе. Пры затрыманні яму гэта прыгадалі, хаця Клімовіч даўно працуе аўтаслесарам.

На пачатку лета 2020-га ён з'ехаў жыць у Польшчу, але быў вымушаны вярнуцца. Праз некалькі дзён пасля вяртання, 17 жніўня, яго затрымалі дома, у аграгарадку Хацежына. Пасля затрымання з ім запісалі "пакаяльнае" відэа. Два з паловай месяцы мужчына правёў пад вартай.