Памежнік-злодзей і дэсант з камароў дзеля ўратавання птушачак — #ІхНоравы

21/06/2024 - 15:02

Міжнародныя навіны / @rubanau_collage

Вандруючы па свеце, часцей пералічвайце свае наяўныя, а яшчэ лепей — расплачвайцеся карткай. Хто ведае, раптам на ваш кашалёк таксама загледзіцца які-небудзь памежнік з аэрапорта Неапаля?

Больш падрабязна пра гэта чытайце ў нашай штодзённай зводкі міжнародных навін.

"Касперскі" забароняць у ЗША за сувязі з Расіяй

Адміністрацыя Байдэна абвясціла, што забароніць "Лабараторыі Касперскага" распаўсюджваць сваё антывіруснае праграмнае забеспячэнне ў ЗША. Гэта матывуецца пагрозай нацыянальнай бяспецы праз сувязі з Расіяй.

"Расія паказала, што ў яе ёсць магчымасць выкарыстоўваць расійскія кампаніі для збору і выкарыстання асабістай інфармацыі амерыканцаў у якасці зброі, таму мы вымушаныя рэагаваць", — расказала міністарка гандлю ЗША Джына Раймонда. Паводле звестак Міністэрства, "Касперскі" знаходзіцца пад расійскай юрысдыкцыяй, падпарадкоўваецца расійскаму ўраду і можа дзяліцца з ім звесткамі.

Калі не штосьці горшае. "Лабараторыя Касперскага" таксама мае магчымасць усталёўваць шкоднае ПЗ на кампутары кліентаў у ЗША.

Бізнес адмаўляе сваё дачыненне да падобнай дзейнасці і лічыць, што "Міністэрства гандлю прыняло рашэнне, грунтуючыся на тэарэтычных асцярогах, а не на ўсебаковай ацэнцы прадуктаў Касперскага".

Камары ідуць на дапамогу птушачкам

Абаронцы прыроды спадзяюцца выратаваць ад малярыі рэдкі від птушак, які жыве на Гаваях, з дапамогай абеззаражвальных камароў. Трыццаць тры віды меданосных ліян вымерлі, а многія з 17, што яшчэ жывуць, знаходзяцца пад пагрозай знікнення, і ёсць асцярогі, што некаторыя з іх могуць знікнуць на працягу года, калі не прыняць меры.

Абаронцы прыроды спрабуюць выратаваць іх з дапамогай незвычайнай стратэгіі: выпусціць больш камароў. Кожны тыдзень верталёт скідае на выспы каля 250 тысяч камароў, якія маюць у сабе бактэрыі, што дзейнічаюць як антыдот ад малярыі.

Паколькі гавайскія птушкі не эвалюцыянавалі разам з птушынай малярыяй — у іх вельмі слабы імунны адказ на яе. Напрыклад, у пунсовага меданоса верагоднасць памерці ад укусу заражанага камара складае 90%.

Сцеражыцеся памежнікаў!

Былы агент памежнай службы ЗША скраў больш за 19 тысяч долараў у пасажыраў падчас дагляду ў аэрапорце Неапаля. 43-гадовы Уільям Джозэф Цімаці здзяйсняў злачынствы, знаходзячыся на службе. Яму пагражае 10 гадоў турэмнага зняволення і штраф — да 250 тысяч долараў.

Аэрапорт Неапаля не мае камерцыйных авіяліній. Ён прымае больш заможную кліентуру, якая карыстаецца прыватнымі чартарнымі рэйсамі. Вось іх і "даглядаў" Цімаці.

Як паказалі запісы відэаназірання, у траўні 2023 года ён правёў памежны і валютны догляд пасажыра, які прыляцеў на прыватным самалёце з Багамскіх астравоў. На кадрах відаць, як пасажыр перадае свае грошы Цімаці, а ён, пералічваючы іх, адкладае 2200 долараў і закрывае іх бланкамі мытных дэкларацый.

Паводле судовых дакументаў, Цімаці яшчэ тройчы скраў у пасажыраў не менш за 2000 долараў і не менш за 1000 долараў у шасці іншых пасажыраў.

"Філасофскі камень" за 53 тысячы еўра

У 1997 годзе лонданскае выдавецтва Bloomsbury выпусціла кнігу "Гары Потэр і філасофскі камень" накладам усяго ў 500 штук, не падазраючы, што яна стане сусветным бестселерам. Каля 300 асобнікаў першага выдання захоўваюцца ў бібліятэках, астатнія разышліся ў рознічным продажы.

Два дні таму ў Эдынбургу адбыўся аўкцыён, дзе рэдкую кнігу ў цвёрдай вокладцы прадалі з малатка за 45 201 фунт стэрлінгаў (каля 53 тысяч еўра).

Для калекцыянераў асабліва каштоўнае тое, што ў кнізе ёсць некалькі памылак. Напрыклад, у адным месцы прапушчаная літара "о": напісана "філасфскі" (Philospher), а на старонцы 53 фраза "адна чароўная палачка" паўтараецца двойчы.