Памежны камітэт Беларусі абвінаваціў Украіну ў мініраванні тэрыторыі на мяжы
Скрыншот відэа
Украінскія вайскоўцы ўсталёўваюць мінныя загароды, руйнуюць дарогі і аб'екты інфраструктуры, заявіў беларускі памежны камітэт. Па словах прэс-службы ведамства, "чарговы факт" быў зафіксаваны 9 лістапада.
"На сумежным баку ўсталёўваюцца міны і на зялёнай мяжы", — адзначылі ва ўстанове. У сваім тэлеграм-канале яны апублікавалі кароткі ролік, на якім удалечыні некалькі чалавек капаюць зямлю.
Раней Дзяржаўны памежны камітэт Беларусі ўжо заяўляў пра "правакацыі ўкраінскіх вайскоўцаў" на мяжы з Беларуссю. 29 кастрычніка камеры відэаназірання беларускіх памежнікаў зафіксавалі "рух у бок мяжы з Беларуссю ўкраінскага БТР-80 з групай узброеных людзей у форме". Аднак перад украінскімі інжынернымі загародамі бронетранспарцёр развярнуўся і ў паехаў назад.
За гэтыя хвіліны беларускія памежнікі "занялі агнявыя пазіцыі для адбіцця магчымай агрэсіі і знішчэння баявой тэхнікі і жывой сілы ў выпадку парушэння мяжы". У баявую гатоўнасць прывялі нават рэзервы.
А 4 лістапада ў ДПК заявілі, што перахапілі ўкраінскі дрон. Тады беларускія памежнікі заявілі, што дрон "ужываўся для трэніровак перамяшчэння і скіду выбуховых прылад, а таксама вядзення выведкі".
