Паранены на беларуска-польскай мяжы вайсковец памёр
![Беларуска-польская мяжа](/sites/default/files/styles/gallery_main/public/2024-06/snimok_ekrana_2024-06-06_163144.png.webp?itok=_j55J1kH)
Беларуска-польская мяжа / Mateusz Kotowicz/Reporter
Паранены мігрантам на беларуска-польскай мяжы польскі вайсковец Матэвуш памёр, пішуць польскія медыя.
"Са смуткам паведамляем, што 6 чэрвеня днём у вайскова-медыцынскім інстытуце ў Варшаве ў атачэнні сваёй сям'і і жаўнераў памёр ад нажавога ранення вайсковец 1-й танкавай брыгады", — заявілі ў паведамленні Узброеных сіл Польшчы ў Facebook.
Словы спачування родным і блізкім загінулага салдата выказаў прэм'ер-міністр Польшчы Дональд Туск.
"Малады салдат Матэвуш аддаў сваё жыццё, абараняючы мяжу Рэспублікі Польшча. Радзіма і суайчыннікі не забудуць гэтай ахвяры. Выказваю глыбокае спачуванне яго блізкім", — напісаў Туск.
Раніцай 28 траўня на польска-беларускай мяжы жаўнер 1-й Варшаўскай бранятанкавай брыгады атрымаў удар нажом з боку беларускай мяжы, калі спрабаваў затрымаць мігранта. У стальным плоце на мяжы мігранты прарабілі пралом, і жаўнер спрабаваў шчытом перакрыць яго. У гэты момант яго ўдарылі нажом.
Каб сачыць за галоўнымі навінамі, падпішыцеся на канал Еўрарадыё ў Telegram.
Мы штодня публікуем відэа пра жыццё ў Беларусі на Youtube-канале. Падпісацца можна тут.