Пракуратура перадала ў суд справу Ціханоўскай, Латушкі, Дылеўскага

Пракуратура накіравала ў суд крымінальную справу супраць Святланы Ціханоўскай, Марыі Мароз, Паўла Латушкі, Вольгі Кавальковай і Сяргея Дылеўскага. Як паведамляе прэс-служба Генпракуратуры, усіх іх завочна вырашана ўзяць пад варту.

Усіх фігурантаў справы вінавацяць у змове з мэтай захопу ўлады неканстытуцыйным шляхам, стварэнні экстрэмісцкага фармавання, закліках да санкцый, распальванні сацыяльнай варожасці.

Акрамя таго, у некаторых ёсць асобныя абвінавачанні. Напрыклад, Ціханоўскую вінавацяць у здрадзе дзяржаве; Ціханоўскую, кавалькову і Латушку разам — у перашкодзе працы Цэнтрвыбаркама і г.д.

"Акрамя таго, Ціханоўская, знаходзячыся на тэрыторыі Літоўскай Рэспублікі, абвясціла сябе пераможцай мінулых выбараў прэзідэнта Рэспублікі Беларусь і адзіным нацыянальным лідарам, абраным беларускім народам", — пералічвае пракуратура "злачынствы".

Суд па гэтай справе будзе завочны. Дата яго пачатку яшчэ не прызначаная.